ڈیزل 2 روپے 29 پیسے مہنگا، پیٹرول 377.91 روپے پر برقرار

اسلام آباد: وفاقی حکومت نے ہائی اسپیڈ ڈیزل کی قیمت میں 2 روپے 29 پیسے فی لیٹر اضافہ کر دیا ہے، جبکہ پیٹرول کی قیمت اگلے تین دن کے لیے تبدیل نہیں کی گئی۔

نئے نرخوں کے مطابق ڈیزل 402.96 روپے فی لیٹر میں فروخت ہوگا اور پیٹرول 377.91 روپے فی لیٹر پر برقرار رہے گا۔ یہ قیمتیں 2 نومبر تک نافذ رہیں گی۔

ایک روز قبل بھی ڈیزل کی قیمت میں 85 پیسے فی لیٹر اضافہ کیا گیا تھا، جس کے بعد یہ 400 روپے کی حد سے اوپر چلی گئی تھی۔

وفاقی کابینہ کی منظوری سے نئے نظام کے تحت اوگرا روزانہ کی بنیاد پر پیٹرول اور ڈیزل کی ایکس ڈپو قیمتیں اپنی ویب سائٹ پر جاری کرے گا۔ اس کا مقصد شفافیت بڑھانا اور عالمی منڈی میں تبدیلیوں کا فائدہ صارفین تک جلد پہنچانا بتایا گیا ہے۔

وزیر پیٹرولیم علی پرویز ملک کے مطابق نیا نظام عالمی پیٹرولیم قیمتوں کی سات روزہ اوسط پر مبنی ہوگا۔ اس سے قبل ہفتہ وار نظام رائج تھا، جو فروری میں اسرائیل ایران تنازع شروع ہونے کے بعد متعارف کرایا گیا تھا، جبکہ اس سے پہلے قیمتوں کا تعین پندرہ روز بعد ہوتا تھا۔

سرکاری دستاویز کے مطابق اوگرا کو روزانہ قیمتیں جاری کرنے کے لیے وزیراعظم یا وفاقی حکومت سے پیشگی منظوری درکار نہیں ہوگی۔ جمعہ کو جاری ہونے والی قیمتیں ہفتے اور اتوار کو بھی برقرار رہیں گی۔

دستاویز میں یہ بھی کہا گیا ہے کہ پیٹرولیم لیوی کابینہ کی منظور کردہ حد سے زیادہ نہیں ہو سکتی اور لیوی کی شرح بدلنے کے لیے وزارت خزانہ کی منظوری لازم ہوگی۔ مٹی کے تیل اور لائٹ ڈیزل آئل کی قیمتیں بھی روزانہ طے ہوں گی۔

مالی سال 2026-27 کے لیے ہائی اسپیڈ ڈیزل کی درآمد صرف پاکستان اسٹیٹ آئل کے ذریعے ہوگی، جبکہ آئل مارکیٹنگ کمپنیاں اپنے مارکیٹ شیئر کے مطابق پیٹرول درآمد کر سکیں گی۔ درآمدی ذمہ داریاں پوری نہ کرنے والی کمپنیوں کو نو ماہ تک نئی درآمدی اجازت نہیں ملے گی۔