گوادر: سماجی تنظیموں اور ماہی گیر اتحادوں کو سات دن میں رجسٹریشن کی ہدایت

گوادر: ڈپٹی کمشنر گوادر کی ہدایات کی روشنی میں ڈپٹی ڈائریکٹر محکمہ سماجی بہبود و خصوصی تعلیم ضلع گوادر نے مختلف سماجی تنظیموں، ماہی گیر اتحادوں اور پرائیویٹ اسکولز ایسوسی ایشن کو متعلقہ قوانین کے تحت رجسٹریشن مکمل کرنے کے لیے باضابطہ ہدایات جاری کر دی ہیں۔

محکمہ سماجی بہبود کی جانب سے جاری مراسلے کے مطابق ضلع گوادر میں کام کرنے والی بعض تنظیموں کی قانونی رجسٹریشن کے حوالے سے دستاویزات طلب کی گئی ہیں۔ متعلقہ تنظیموں کو ہدایت کی گئی ہے کہ وہ مجاز حکام اور متعلقہ قوانین کے تحت رجسٹریشن کا عمل مکمل کرکے مراسلے کے اجرا سے سات روز کے اندر رجسٹریشن کا ثبوت دفتر ڈپٹی ڈائریکٹر سماجی بہبود میں جمع کرائیں۔

مراسلہ جن تنظیموں کو ارسال کیا گیا ہے ان میں زیر ماہی گیر اتحاد، باٹیل ماہی گیر اتحاد، کاروان ماہی گیر اتحاد، گوادر ماہی گیر اتحاد لیبر یونین، متحدہ ماہی گیر اتحاد اور پرائیویٹ اسکولز ایسوسی ایشن شامل ہیں۔ محکمہ ہذا نے واضح کیا ہے کہ مقررہ مدت میں ہدایات پر عمل درآمد نہ کرنے کی صورت میں متعلقہ تنظیموں کی سرگرمیوں کی معطلی یا پابندی سمیت قانونی اقدامات کیے جا سکتے ہیں۔