پی ٹی آئی اور حکومت کے مذاکرات چند دنوں میں دوبارہ شروع ہو سکتے ہیں: عامر ڈوگر

اسلام آباد: پی ٹی آئی چیف وہپ عامر ڈوگر نے آئندہ دنوں میں مذاکرات دوبارہ شروع ہونے کا عندیہ دیا ہے۔ نجی ٹی وی سے گفتگو میں انہوں نے کہا کہ آئندہ کچھ دنوں میں مذاکرات دوبارہ شروع ہو سکتے ہیں۔

ان کے مطابق بانی چیئرمین کی مرضی کے بغیر وزیراعلیٰ کی تبدیلی چاہنے والے 68 ارکان سے متعلق سلمان اکرم راجہ نے سخت مؤقف اپنایا ہے۔ عامر ڈوگر کا کہنا تھا کہ پارٹی میں اندرونی اختلافات کی خبریں بے بنیاد ہیں اور پارلیمانی پارٹی کے اندر کوئی اختلافات نہیں۔

انہوں نے کہا کہ اپوزیشن لیڈران محمود خان اچکزئی اور علامہ راجہ ناصر عباس پر مکمل اعتماد ہے، ان دونوں کو بانی چیئرمین کی حمایت حاصل ہے اور ہمارا فرض ہے کہ ہم ان کے ساتھ چلیں۔

عامر ڈوگر نے کہا کہ سہیل آفریدی ہی دو تہائی اکثریت کے ساتھ آئینی اور قانونی وزیر اعلیٰ ہیں اور بانی چیئرمین کے اعتماد کے مطابق وزیر اعلیٰ ہیں۔ جو بھی وزیر اعلیٰ بنے گا، وہ بانی چیئرمین کی مرضی کے بغیر نہیں آ سکتا، اور جو بھی یہ کام کر رہا ہے وہ پارٹی کی پیٹھ میں چھرا گھونپے گا۔

ان کا کہنا تھا کہ سہیل آفریدی ہی وزیر اعلیٰ ہیں اور وہی رہیں گے، کچھ لوگ پارٹی میں مزید دراڑ ڈالنا چاہتے ہیں، فی الحال فسطائیت عروج پر ہے اور تحریک انصاف کے خلاف ظلم اور بربریت کی کوئی مثال نہیں ملتی۔ 10 سے زیادہ ارکان قومی اسمبلی جیل میں ہیں۔

انہوں نے کہا کہ ہم مذاکرات پر یقین رکھتے ہیں اور امید ہے آنے والے دنوں میں مذاکرات کا سلسلہ شروع ہو جائے گا۔