پی ٹی آئی قیادت سوشل میڈیا کے اثر سے نکل آئے تو اس کی سیاست کے لیے اچھا ہوگا: خواجہ آصف

اسلام آباد: وزیر دفاع خواجہ آصف نے کہا ہے کہ اگر پی ٹی آئی قیادت سوشل میڈیا کے اثر سے نکل جائے تو یہ اس کی سیاست کے لیے اچھا ہوگا۔

پارلیمنٹ ہاؤس میں صحافیوں سے گفتگو میں خواجہ آصف نے کہا کہ وہ مولانا کے بارے میں کسی اور (ن) لیگی رہنما کی گفتگو پر تبصرہ نہیں کر سکتے۔

ان کا کہنا تھا کہ مولانا فضل الرحمان نے سخت گفتگو کی ہے اور انہوں نے مولانا کے سخت بیانات پر سیاسی نکتہ چینی کی ہے۔

وزیر دفاع نے کہا کہ سیاست میں نو ریٹرن والی کوئی پالیسی نہیں ہوتی، کل کے دوست آج کے دشمن اور کل کے دشمن آج کے دوست بن جاتے ہیں۔

انہوں نے کہا کہ پی ٹی آئی کے اندر سے آوازیں اٹھ رہی ہیں کہ مزاحمت نہیں بلکہ سیاست کرنی چاہیے، اور اگر پی ٹی آئی سیاست کرے گی تو اسے بہت اسپیس مل جائے گی۔