کیلیفورنیا میں غیر قانونی ووٹنگ کے الزام میں 28 گرین کارڈ ہولڈرز پر مقدمات، 2 بھارتی شہری بھی شامل

کیلیفورنیا: امریکی ریاست کیلیفورنیا میں امریکی شہری نہ ہونے کے باوجود ووٹر کے طور پر اندراج اور انتخابات میں ووٹ ڈالنے کے الزامات پر گرین کارڈ رکھنے والے 28 افراد کے خلاف مقدمات درج کر لیے گئے۔

امریکی محکمہ انصاف کے مطابق یہ کارروائی 19 اکتوبر کو انتخابی بدعنوانی کے خلاف شروع کیے گئے آپریشن کے تحت کی گئی، جس کے دوران 11 افراد کو گرفتار کیا گیا۔

تمام ملزمان امریکا میں مستقل رہائش کا قانونی اجازت نامہ یعنی گرین کارڈ رکھتے ہیں، تاہم وہ امریکی شہری نہیں اور وفاقی انتخابات میں ووٹ ڈالنے کے اہل نہیں، اس کے باوجود انہوں نے ووٹ کاسٹ کیے۔

بھارتی شہریوں پر الزامات

امریکی حکام کے مطابق 30 سالہ بھارتی شہری اماندیپ کور پر دسمبر 2022 میں غیر قانونی طور پر ووٹر کے طور پر اندراج کرانے اور نومبر 2024 کے صدارتی انتخابات میں ووٹ ڈالنے کا الزام ہے، ان پر شہریت کی درخواست میں غلط بیانی کا الزام بھی ہے۔

دوسرے بھارتی شہری 67 سالہ کملیش نوینتل لال شاہ ہیں، جن پر نومبر 2024 کے عام انتخابات کے روز غیر قانونی طور پر ووٹر رجسٹریشن کرانے اور ووٹ ڈالنے کا الزام ہے۔

امریکی حکام نے واضح نہیں کیا کہ آیا دونوں بھارتی شہری گرفتار ہونے والے 11 افراد میں شامل ہیں یا نہیں۔

بعض ملزمان کو ووٹر رجسٹریشن میں غلط بیانی اور شہریت کی درخواست میں جھوٹے بیانات دینے کے الزامات کا سامنا ہے۔ امریکا میں ان جرائم پر زیادہ سے زیادہ پانچ سال قید کی سزا ہو سکتی ہے۔