سلطان اذلان شاہ کپ کی تیاری: ہاکی فیڈریشن کا 30 اکتوبر کو اسلام آباد میں ٹرائلز کیمپ

اسلام آباد: پاکستان ہاکی فیڈریشن نے ملائیشیا کے شہر ایپوہ میں 20 نومبر 2026ء سے 28 نومبر 2026ء تک کھیلے جانے والے سلطان اذلان شاہ ہاکی کپ میں قومی ٹیم کی تیاریوں کے لیے جامع حکمت عملی وضع کر لی ہے۔

ٹورنامنٹ کی تیاریوں اور حتمی اسکواڈ کی شفاف سلیکشن کے لیے ملک بھر سے انڈر 18، جونیئر اور سینئر کھلاڑیوں کو 30 اکتوبر کو نصیر بندہ ہاکی سٹیڈیم، اسلام آباد میں مدعو کیا گیا ہے۔

مذکورہ کیمپ سے باصلاحیت کھلاڑیوں پر مشتمل تین پول بنائے جائیں گے۔ تینوں فارمیٹس کے کھلاڑیوں کو پولز میں تقسیم کر کے ان کی تکنیکی صلاحیتوں کا جائزہ لے کر انتخاب کیا جائے گا۔

فیڈریشن حکام کے مطابق پاکستان ہاکی کی تاریخ میں پہلی بار اتنے بڑے پیمانے پر ٹیلنٹ کو موقع دیا جا رہا ہے، جہاں ملک بھر کے تمام قابل کھلاڑیوں کو اس ٹریننگ کیمپ میں شرکت کا موقع ملے گا۔ کیمپ کا مقصد ابھرتے ہوئے نوجوان کھلاڑیوں کو سینئر سطح پر صلاحیتیں دکھانے کے لیے مساوی اور یکساں پلیٹ فارم فراہم کرنا ہے۔

کیمپ کے دوران تمام کھلاڑیوں کی جسمانی فٹنس، تکنیکی مہارت اور کھیل کی حکمت عملیوں کا باریک بینی سے جائزہ لیا جائے گا، جس کے بعد میرٹ کی بنیاد پر سلطان اذلان شاہ کپ کے لیے حتمی قومی ہاکی ٹیم کا انتخاب ہوگا۔

پاکستان ہاکی فیڈریشن نے عزم کا اعادہ کیا کہ میرٹ اور شفافیت کو یقینی بناتے ہوئے ایسی متوازن ٹیم تشکیل دی جائے گی جو بین الاقوامی سطح پر ملک و قوم کا نام روشن کر سکے۔