پاکستان میں کرکٹ کھیلنا چیلنجنگ ہے، ٹرائی سیریز میں بہترین ٹیمیں مدمقابل ہوں گی: ہیری بروک

راولپنڈی: انگلینڈ کے کپتان ہیری بروک نے کہا ہے کہ پاکستان میں کرکٹ کھیلنا چیلنجنگ ہوتا ہے اور ٹرائی سیریز میں بہترین ٹیموں کے درمیان مقابلہ ہوگا۔

راولپنڈی کرکٹ اسٹیڈیم میں پریس کانفرنس کرتے ہوئے انہوں نے کہا کہ وہ پاکستان سپر لیگ میں لاہور قلندرز کی نمائندگی کر چکے ہیں اور پاکستان کی کنڈیشنز اور یہاں کے کھلاڑیوں کو جانتے ہیں۔ ان کے مطابق پاکستان میں کرکٹ کھیلتے ہوئے انہیں زیادہ اعتماد محسوس ہوتا ہے۔

ہیری بروک نے کہا کہ انگلینڈ ایسی ٹیم بننا چاہتا ہے جو ہر کنڈیشن میں کامیابی حاصل کر سکے اور کسی بھی ہدف کا تعاقب کر سکے۔ انہوں نے کہا کہ وہ انگلینڈ کے لیے زیادہ سے زیادہ کرکٹ کھیلنا چاہتے ہیں۔

انہوں نے بتایا کہ انہوں نے 22 سال کی عمر میں پاکستان سپر لیگ کھیلی تھی اور اس سے انٹرنیشنل کرکٹ میں بہت مدد ملی۔

انگلینڈ کپتان کا کہنا تھا کہ ان کی ٹیم زیادہ تجربہ کار نہیں اور چند کھلاڑیوں نے ہی 50 ون ڈے میچز کھیلے ہیں۔

ہیری بروک نے کہا کہ وہ بیٹر ہیں اور انہیں ایسی پچز پسند ہیں جہاں زیادہ رنز بن سکیں۔ ان کے بقول تماشائی بھی ایسی پچز پسند کرتے ہیں جہاں چوکے اور چھکے لگیں۔ انہوں نے کہا کہ ورلڈ کپ سے قبل زیادہ سے زیادہ میچز کھیلنے کا فائدہ ہوگا۔