توبہ کاکڑی اور برشور کے قبائلی عمائدین کی شعیب نوشیروانی سے ملاقات، پی ایم ڈی سی کو زمینوں کی الاٹمنٹ پر تحفظات

کوئٹہ: صوبائی وزیر خزانہ و معدنیات میر شعیب نوشیروانی سے توبہ کاکڑی اور برشور سے تعلق رکھنے والے قبائلی عمائدین نے ملاقات کی، جس میں پاکستان منرل ڈویلپمنٹ کارپوریشن (PMDC) کو مقامی زمینوں کی الاٹمنٹ سے متعلق امور پر تفصیلی تبادلہ خیال کیا گیا۔

وفد نے صوبائی وزیر کو زمینوں کی ملکیت، الاٹمنٹ اور اس حوالے سے اپنے تحفظات سے آگاہ کیا اور کہا کہ یہ زمینیں مقامی قبائل اور مقامی مالکان کی ملکیت ہیں، اس لیے کسی بھی معاملے میں مقامی زمین مالکان کو اعتماد میں لینا ضروری ہے۔

وفد نے مطالبہ کیا کہ پی ایم ڈی سی کے ذمہ دار نمائندے مقامی زمین مالکان اور قبائلی عمائدین کے ساتھ باضابطہ بات چیت کریں تاکہ قانونی، انتظامی اور مقامی نوعیت کے تمام تحفظات باہمی مشاورت سے دور کیے جا سکیں۔

میر شعیب نوشیروانی نے وفد کا مؤقف غور سے سنا اور یقین دہانی کرائی کہ معاملہ متعلقہ فورم پر زیرِ غور لایا جائے گا اور مقامی لوگوں کے تحفظات مناسب طریقے سے متعلقہ حکام کے سامنے رکھے جائیں گے۔ ملاقات میں مقامی زمینوں کے حقوق، معدنی وسائل اور مقامی آبادی کے جائز مفادات کے تحفظ پر بھی گفتگو ہوئی۔

تصویر: بشکریہ ڈی جی پی آر بلوچستان