یوم دفاع پر کوئٹہ میں بزم صائم ادبیات کا کثیر اللسانی مشاعرہ، سنجے کمار مہمان خصوصی

کوئٹہ: صوبائی مشیر برائے کھیل و امورِ نوجوانان محترمہ مینا مجید بلوچ کی ہدایت پر محکمہ کھیل و امورِ نوجوانان کے تعاون سے بزمِ صائم ادبیات اکیڈمی کے زیرِ اہتمام یومِ دفاعِ پاکستان کی مناسبت سے گورنمنٹ گرلز کالج جناح ٹاؤن میں محفلِ مشاعرہ منعقد ہوئی جس میں بلوچستان کی مختلف زبانوں کے شعرا اور ادیبوں نے شرکت کی۔

مشاعرے کی صدارت پشتو اور اردو کے سینئر شاعر سرور سودائی نے کی، جبکہ رکن صوبائی اسمبلی و پارلیمانی سیکرٹری اقلیتی امور سنجے کمار پنجوانی مہمانِ خصوصی تھے۔ سرور جاوید، اعجاز امر، نور خان نواب، فرزانہ خدرزئی، تسنیم صنم، رشید حسرت، کامران قمر، زاہد دشتی، نور بلیدی اور دیگر شعرا نے پشتو، براہوی، بلوچی، اردو اور سندھی میں کلام پیش کیا، جبکہ کالج کی طالبات اور نوجوان شعرا نے بھی اشعار سنائے۔

سنجے کمار نے کہا کہ ملکی دفاع اور قومی شعور کی بیداری میں شعرا اور ادیبوں کا کردار ہمیشہ یاد رکھا جائے گا۔ انہوں نے کہا کہ مینا مجید بلوچ نے تمام زبانوں کے شعرا کو ایک پلیٹ فارم پر جمع کر کے قومی یکجہتی اور کثیر اللسانی ہم آہنگی کا پیغام دیا ہے، اور بلوچستان کی زبانیں اور ان کا ادب ہماری ثقافتی شناخت کا قیمتی سرمایہ ہیں۔

ڈائریکٹر یوتھ افیئرز سجاد اسلم بلوچ نے کہا کہ محکمہ امورِ نوجوانان نوجوانوں کو مثبت سرگرمیوں کے مواقع فراہم کرتا رہے گا اور نوجوان شعرا و ادیبوں کی بھرپور حوصلہ افزائی کی جائے گی۔ محفل کے اختتام پر شرکاء میں انعامات، اعزازات اور شیلڈز تقسیم کی گئیں۔

تصویر: بشکریہ ڈی جی پی آر بلوچستان