گوادر میں 5 اکتوبر کو تکریمِ اساتذہ کی تقریب، نمایاں اساتذہ کو ایوارڈز دیے جائیں گے

گوادر: ڈسٹرکٹ ایجوکیشن آفیسر گوادر زاہد حسین کی زیرِ صدارت ڈسٹرکٹ ایجوکیشن آفس گوادر میں اجلاس منعقد ہوا جس میں 5 اکتوبر کو گوادر میں تکریمِ اساتذہ کی خصوصی تقریب منعقد کرنے کا فیصلہ کیا گیا۔ اجلاس میں میر کاروان کے سربراہ میر ارشد کلمتی نے خصوصی شرکت کی۔

اجلاس میں کہا گیا کہ اساتذہ معاشرے کی علمی و فکری تربیت اور نئی نسل کی کردار سازی میں بنیادی کردار ادا کرتے ہیں، اور ان کی خدمات کا اعتراف و حوصلہ افزائی تعلیمی معیار کی بہتری اور مثبت تعلیمی ماحول کے لیے ناگزیر ہے۔ اجلاس میں عالمی یومِ اساتذہ کے اغراض و مقاصد اور اساتذہ کی خدمات کو خراجِ تحسین پیش کرنے کے مختلف امور پر غور کیا گیا۔

متفقہ طور پر فیصلہ ہوا کہ گزشتہ برسوں کی روایت برقرار رکھتے ہوئے اس سال بھی 5 اکتوبر کو میر کاروان کے زیرِ اہتمام اور میر ارشد کلمتی کی سربراہی میں تقریب منعقد ہوگی، جس میں سرکاری و نیم سرکاری اسکولوں، کالجوں، جامعہ گوادر اور اکیڈمیوں کے نمایاں کارکردگی دکھانے والے اساتذہ کو ایوارڈز دیے جائیں گے۔

میر ارشد کلمتی نے کہا کہ اساتذہ کی حوصلہ افزائی دراصل تعلیم کے فروغ اور نئی نسل کے بہتر مستقبل میں سرمایہ کاری ہے، اور نمایاں اساتذہ کی پذیرائی سے دیگر اساتذہ کو بھی محنت اور تعلیمی معیار بلند کرنے کی ترغیب ملتی ہے۔ اجلاس میں تقریب کو مؤثر، باوقار اور اساتذہ کی خدمات کے شایانِ شان بنانے کے لیے مختلف تجاویز پر بھی تبادلہ خیال ہوا۔

تصویر: بشکریہ ڈی جی پی آر بلوچستان