ڈپٹی کمشنر قلات عائشہ زہری کا دستکاری سینٹر کا دورہ، طالبات نے دو سال سے بند وظائف کا مسئلہ اٹھایا

قلات: ڈپٹی کمشنر قلات انجینئر عائشہ زہری نے دستکاری سینٹر سمال انڈسٹریز کا دورہ کیا، جہاں انہوں نے اسٹاف کی حاضری، ٹیکنیکل و نان ٹیکنیکل عملے اور زیرِ تربیت طالبات کی تعداد، ویونگ سیکشن، اسٹاف روم اور دیگر شعبوں کا جائزہ لیا۔

اسسٹنٹ ڈائریکٹر حاجی صالح محمد اور اسسٹنٹ مینیجر عبدالفتاح نے سینٹر کا دورہ کرایا اور کشیدہ کاری، ٹیلرنگ اور کارپٹنگ کے کورسز سمیت جاری فنی تربیتی پروگرامز پر بریفنگ دی۔ ڈپٹی کمشنر نے ٹرینیز سے ملاقات کر کے ان کے مسائل دریافت کیے، جنہوں نے گزشتہ دو سال سے وظائف کی بندش سے بھی آگاہ کیا۔ طالبات نے ڈپٹی کمشنر کو سینٹر میں تیار کردہ روایتی چادر بھی پہنائی۔

انجینئر عائشہ زہری نے کہا کہ خواتین معاشرے کا اہم اور فعال حصہ ہیں اور ان کی تعلیم، فنی تربیت اور معاشی خودمختاری کے لیے مؤثر اقدامات وقت کی ضرورت ہیں۔ دستکاری سینٹر جیسے ادارے خواتین کو روایتی ہنر سیکھنے اور اپنی مصنوعات مارکیٹ تک پہنچانے میں اہم کردار ادا کر رہے ہیں۔ انہوں نے کہا کہ ضلعی انتظامیہ خواتین کی سہولیات میں بہتری اور ان کے مسائل کے حل کے لیے ہر ممکن تعاون کرے گی۔

تصویر: بشکریہ ڈی جی پی آر بلوچستان