گورنر خیبر پختونخوا کنڈی: وفاق کے ساتھ چلیں گے، گندم کی گمشدگی پر انکوائری شروع

پشاور: گورنر خیبر پختونخوا فیصل کریم کنڈی کا کہنا ہے کہ وفاق کے ساتھ چلیں گے اور سب صوبوں کے ساتھ ایک پیج پر ہوں گے۔ ان کے مطابق اب اختلافات نہیں ہوں گے اور ایک یونٹ کے طور پر کام کیا جائے گا۔

پشاور میں میڈیا سے گفتگو کرتے ہوئے انہوں نے کہا کہ پورے صوبے کو صاف ستھرا بنانے کا تہیہ کر لیا گیا ہے اور صفائی و ستھرائی اور تجاوزات کے خلاف آپریشن کا آغاز پشاور سے کیا گیا ہے۔

گندم اور ترقیاتی منصوبے

فیصل کریم کنڈی نے کہا کہ گندم کے حوالے سے انکوائری شروع کر دی گئی ہے کہ جو گندم ہمیں ملنی تھی وہ کیسے غائب کی گئی۔ ان کے مطابق حقائق سامنے لائے جائیں گے اور رپورٹ جلد جاری ہوگی۔

ان کا کہنا تھا کہ اب صرف اچھے ترقیاتی منصوبے ہوں گے۔ یہاں ترقیاتی کاموں پر چار چار محکمے بل بناتے تھے۔ جو ترقیاتی منصوبہ مفید نہ ہو اس پر کام نہیں کیا جائے گا اور کسی کو پیسے کھانے نہیں دیں گے۔

ٹریفک، بجلی اور گیس

گورنر کے پی نے کہا کہ ٹریفک قوانین پر میٹنگ بلائی گئی ہے اور ٹریفک نظام بہتر بنایا جائے گا۔ ٹریفک قوانین بننے جا رہے ہیں، چالان کی شکایت ختم ہو جائے گی اور باقاعدہ کیمروں کی مدد سے نظام بہتر کیا جائے گا۔

انہوں نے کہا کہ بجلی کی بڑھتی لوڈ شیڈنگ پر واپڈا کے ساتھ بیٹھوں گا۔ بجلی چوری کا زمانہ بھی گیا، اب لوگ بل دیں گے۔ ان کے بقول وہ زمانہ گیا کہ کہا جائے وفاق زیادتی کر رہا ہے، لوڈشیڈنگ اور گیس بند کر رہا ہے۔ بجلی اور گیس کا معاملہ جلد حل ہوگا۔