گورنر جعفر خان مندوخیل کی زیر صدارت وویمن یونیورسٹی کا سینیٹ اجلاس، کیمپسز کے کنٹریکٹ ملازمین ریگولر ہوں گے

کوئٹہ: گورنر بلوچستان جعفر خان مندوخیل نے کہا ہے کہ ہمیں ملک بھر کی سطح پر آرٹیفیشل انٹیلیجنس کے شعبے میں دس لاکھ ماہرین تیار کرنے ہوں گے، اور اس عظیم خواب کو حقیقت کا روپ دینے کے لیے تمام پبلک سیکٹر جامعات کے وائس چانسلرز کو کلیدی اور فعال کردار ادا کرنا ہوگا۔

انہوں نے یہ بات سردار بہادر خان وویمن یونیورسٹی کے سولہویں سینیٹ اجلاس کی صدارت کرتے ہوئے کہی۔ گورنر نے کہا کہ وائس چانسلر پروفیسر ڈاکٹر روبینہ مشتاق اور ان کی پوری ٹیم کی کوششیں لائق تحسین ہیں، تاہم وویمن یونیورسٹی کو پاکستان کی ٹاپ یونیورسٹیز میں لانے کے لیے بہت کچھ کرنا باقی ہے۔

کیمپسز کے کنٹریکٹ ملازمین ریگولر ہوں گے

سپریم کورٹ آف پاکستان کے فیصلے کے تحت سردار بہادر خان وویمن یونیورسٹی کے خضدار، پشین اور نوشکی کیمپسز کے ان تمام کنٹریکٹ ملازمین کو ریگولرائز کیا جائے گا جنہیں بھرتی کے تمام قانونی تقاضے اور مقررہ ضوابط مکمل کرنے کے بعد کنٹریکٹ کی بنیاد پر تعینات کیا گیا تھا اور جو تاحال اپنی خدمات انجام دے رہے ہیں۔ ریگولرائزیشن کے عمل سے قبل ملازمین کی دستاویزات اور دیگر مطلوبہ کوائف کی مکمل تصدیق کے لیے ایک خصوصی کمیٹی بھی تشکیل دے دی گئی ہے۔

اجلاس میں بلوچستان ہائی کورٹ کے جسٹس عامر رانا، صوبائی وزیر تعلیم راحیلہ حمید خان درانی، رکن صوبائی اسمبلی کلثوم نیاز بلوچ، صوبائی سیکرٹری ہائیر ایجوکیشن ہاشم خان غلزئی، ہائیر ایجوکیشن کمیشن کی سینیئر عہدیدار ڈاکٹر نور آمنہ ملک، قومی کمیشن برائے وقار نسواں کی چیئرپرسن نورین بانو لہڑی اور پرنسپل سیکرٹری ٹو گورنر بلوچستان عبدالناصر دوتانی سمیت سینیٹ ممبران موجود تھے۔

گورنر مندوخیل نے سینیٹ اجلاس کے شرکاء سے خطاب کرتے ہوئے کہا کہ یونیورسٹی کے تمام امور و معاملات میں میرٹ کی پاسداری ہر صورت یقینی بنائی جائے۔ انہوں نے کہا کہ وویمن یونیورسٹی کی رینکنگ اینڈ اسکورنگ میں مسلسل اضافہ خوش آئند ہے۔

انہوں نے زور دیا کہ معیاری تعلیم اور جدید تقاضوں سے ہم آہنگ ماڈرن اسکلز ڈیولپمنٹ پر خصوصی توجہ دی جائے تاکہ یونیورسٹی کی طالبات معاشرے کی معاشی و معاشرتی تعمیر و ترقی میں بامعنی شراکت کے قابل بن سکیں۔ سینیٹ اجلاس کے شرکاء کی تجاویز اور سفارشات کے نتیجے میں کئی اہم فیصلے بھی کیے گئے۔

تصویر: بشکریہ ڈی جی پی آر بلوچستان