گوادر میں محفوظ سیاحتی زون کے قیام پر اجلاس، ڈپٹی کمشنر نقیب اللہ کاکڑ کی سیاحتی مقامات کے سروے کی ہدایت

گوادر: ڈپٹی کمشنر گوادر نقیب اللہ کاکڑ کی زیر صدارت گوادر میں محفوظ سیاحتی زون کے قیام سے متعلق اجلاس منعقد ہوا۔

اجلاس میں متعلقہ محکموں کے افسران، جن میں ایڈیشنل ڈپٹی کمشنر ریونیو ظہور احمد بلوچ، گوادر پورٹ اتھارٹی کے شبیر احمد اور منیر احمد بانا اور ادارہ ترقیات گوادر کے شاہد بلوچ شامل تھے، سمیت دیگر اسٹیک ہولڈرز نے شرکت کی۔

اجلاس میں گوادر کے موزوں سیاحتی مقامات کی نشاندہی، ان کی استعداد کا جائزہ لینے اور محفوظ سیاحتی زون کے قیام کے مختلف پہلوؤں پر تفصیلی غور کیا گیا۔ اس موقع پر سیاحوں کو محفوظ، پرامن اور معیاری سہولیات کی فراہمی، بنیادی ڈھانچے کی بہتری، بین الادارہ تعاون اور سیاحت کے فروغ کے لیے مربوط حکمت عملی اختیار کرنے پر اتفاق کیا گیا۔

ڈپٹی کمشنر گوادر نے کہا کہ حکومت بلوچستان کے وژن کے مطابق گوادر کو محفوظ، پرکشش اور عالمی معیار کی سیاحتی منزل کے طور پر ترقی دینا ترجیحات میں شامل ہے۔ انہوں نے متعلقہ اداروں کو ہدایت کی کہ مجوزہ سیاحتی مقامات کا جامع سروے مکمل کر کے قابلِ عمل تجاویز مرتب کی جائیں تاکہ اس منصوبے پر مؤثر انداز میں پیش رفت ممکن ہو۔

اجلاس میں کہا گیا کہ محفوظ سیاحتی زون کے قیام سے گوادر میں سیاحت، سرمایہ کاری، مقامی کاروبار اور روزگار کے نئے مواقع پیدا ہوں گے، جس سے ضلع کی معاشی و سماجی ترقی کو مزید فروغ ملے گا۔

تصویر: بشکریہ ڈی جی پی آر بلوچستان