گوادر سیف سٹی منصوبہ: کیبلنگ اور پولز کی تنصیب تقریباً مکمل، اگلے مرحلے میں جدید کیمرے نصب ہوں گے

گوادر: گوادر کو جدید، محفوظ اور اسمارٹ پورٹ سٹی میں تبدیل کرنے کے وژن کے تحت گوادر سیف سٹی منصوبے پر تیزی سے پیش رفت جاری ہے۔ اس سلسلے میں پروجیکٹ ڈائریکٹر گوادر سیف سٹی ڈاکٹر آصف خان بڑیچ نے ڈائریکٹر جنرل گوادر ڈویلپمنٹ اتھارٹی معین الرحمٰن خان سے ان کے دفتر میں ملاقات کی۔ اس موقع پر چیف انجینئر جی ڈی اے حاجی سید محمد بھی موجود تھے۔

پروجیکٹ ڈائریکٹر نے منصوبے کی اب تک کی پیش رفت، جاری تعمیراتی کام اور آئندہ مراحل پر بریفنگ دیتے ہوئے بتایا کہ شہر کے اہم، حساس اور مصروف مقامات پر سیکیورٹی کیمروں کی تنصیب کے لیے انڈر گراؤنڈ کیبلنگ اور پولز کی تنصیب کا کام تقریباً مکمل ہو چکا ہے، جبکہ اگلے مرحلے میں جدید کیمروں کی انسٹالیشن شروع کی جائے گی۔

انہوں نے بتایا کہ منصوبے کے مرکزی کمپلیکس اور کمانڈ اینڈ کنٹرول سینٹر کی تعمیر بھی تیزی سے جاری ہے۔ مرکزی کنٹرول سینٹر مکمل ہونے کے بعد شہر بھر کے کیمروں کو ایک مربوط ڈیجیٹل نیٹ ورک کے ذریعے مرکزی نظام سے جوڑا جائے گا، جس سے گوادر میں چوبیس گھنٹے مؤثر نگرانی کا نظام قائم ہوگا۔

ڈائریکٹر جنرل جی ڈی اے معین الرحمٰن خان نے کہا کہ گوادر پاکستان کا معاشی مستقبل اور عالمی سرمایہ کاری کا ابھرتا ہوا مرکز ہے، جس پر دنیا بھر کے سرمایہ کاروں اور کاروباری اداروں کی نظریں ہیں، اس لیے شہریوں، سرمایہ کاروں، غیر ملکی ماہرین، کاروباری شخصیات اور سیاحوں کے لیے محفوظ ماحول ناگزیر ہے۔

انہوں نے کہا کہ سیف سٹی منصوبہ شہر کے سیکیورٹی انفراسٹرکچر کو جدید خطوط پر استوار کرنے کے ساتھ سرمایہ کاری، تجارت اور ترقیاتی سرگرمیوں کے لیے سازگار ماحول پیدا کرے گا۔ منصوبے کی بروقت تکمیل جی ڈی اے کی ترجیحات میں شامل ہے اور متعلقہ شعبوں کو کام کی رفتار مزید تیز کرنے کی ہدایت کر دی گئی ہے۔

تصویر: بشکریہ ڈی جی پی آر بلوچستان