کمشنر لورالائی کی ہدایت پر میونسپل کمیٹی کی شہر بھر میں صفائی مہم، نالیوں اور قبرستانوں کی صفائی جاری

لورالائی: کمشنر لورالائی ڈویژن ولی محمد بڑیچ کی خصوصی ہدایات پر میونسپل کمیٹی لورالائی کی جانب سے شہر کو صاف ستھرا رکھنے کے لیے مختلف علاقوں میں صفائی ستھرائی کا عمل تسلسل سے جاری ہے۔

چیف آفیسر میونسپل کمیٹی لورالائی محب اللہ خان کی نگرانی میں صفائی عملہ شہر کے مختلف زونز میں نالیوں، مین ہولز، گلی محلوں، شاہراہوں اور قبرستانوں کی صفائی میں مصروف ہے۔ سبزی منڈی کمپلینٹ زون میں نالیوں کی صفائی اور مین ہولز کی تنصیب کا کام کیا جا رہا ہے، جبکہ گنجئی قبرستان میں جمع کچرا صاف کیا گیا۔

شہر کے مختلف علاقوں سے ٹریکٹر ٹرالیوں کے ذریعے کچرے کی بروقت منتقلی بھی جاری ہے۔ دوبی گاٹ محلہ، بائی پاس ترکئی گلی اور پنجابی محلہ سمیت مختلف علاقوں میں نالیوں کی صفائی اور گلیوں میں جھاڑو لگایا جا رہا ہے، جبکہ نکاسی آب کا نظام بہتر بنانے کے لیے بند نالیوں کی صفائی پر خصوصی توجہ دی جا رہی ہے۔

میونسپل کمیٹی حکام کے مطابق صفائی کا عمل روزانہ کی بنیاد پر جاری ہے اور تمام زونز میں مرحلہ وار انتظامات یقینی بنائے جا رہے ہیں۔ انہوں نے شہریوں سے اپیل کی کہ صفائی عملے سے تعاون کریں، کچرا مقررہ مقامات پر ڈالیں اور گلیوں، نالیوں اور عوامی مقامات پر کوڑا کرکٹ پھینکنے سے گریز کریں۔

حکام کے مطابق صاف ستھرا ماحول نہ صرف شہر کی خوبصورتی بڑھاتا ہے بلکہ بیماریوں سے بچاؤ اور صحت مند معاشرے کے قیام میں بھی اہم کردار ادا کرتا ہے، اس لیے میونسپل کمیٹی لورالائی شہریوں کو بہتر ماحول کی فراہمی کے لیے تمام دستیاب وسائل بروئے کار لا رہی ہے۔

تصویر: بشکریہ ڈی جی پی آر بلوچستان