مولانا ہدایت الرحمان کا پی پی ایچ آئی دفتر گوادر کا دورہ، غیر فعال ہسپتالوں کی بحالی پر زور

گوادر: رکن صوبائی اسمبلی مولانا ہدایت الرحمان بلوچ نے پیپلز پرائمری ہیلتھ کیئر انیشی ایٹو (پی پی ایچ آئی) کے ضلعی دفتر گوادر کا دورہ کیا اور ضلعی منیجر ڈاکٹر منیر احمد بلوچ سے ملاقات میں ضلع گوادر کے غیر فعال ہسپتالوں کی بحالی، ڈاکٹرز و طبی عملے کی تعیناتی اور بنیادی طبی سہولیات کی فراہمی پر تفصیلی تبادلہ خیال کیا۔

مولانا ہدایت الرحمان بلوچ نے کہا کہ دور دراز علاقوں کے لوگوں کو ان کی دہلیز پر صحت کی بنیادی سہولیات فراہم کی جائیں۔ انہوں نے غیر حاضر ڈاکٹرز اور طبی عملے کے خلاف بلاامتیاز محکمانہ کارروائی اور ہسپتالوں میں عملے کی حاضری یقینی بنانے پر زور دیا۔

ڈاکٹر منیر احمد بلوچ نے یقین دہانی کرائی کہ ہسپتالوں کی بحالی، ڈاکٹرز کی تعیناتی اور ضروری طبی سہولیات کے لیے مؤثر اقدامات کیے جائیں گے۔ مولانا ہدایت الرحمان نے کہا کہ بہتر طبی سہولیات کے لیے متعلقہ اداروں سے رابطہ اور پیروی جاری رکھی جائے گی۔

تصویر: بشکریہ ڈی جی پی آر بلوچستان