لورالائی میں ملیریا پروگرام کے تحت کمیونٹی ہیلتھ ورکرز کی چار روزہ ICCM تربیت

لورالائی: ملیریا پروگرام کے تحت چار روزہ ICCM (Integrated Community Case Management) تربیتی پروگرام ڈسٹرکٹ ہیلتھ آفیسر لورالائی ڈاکٹر فہیم خان کی زیرِ صدارت منعقد ہوا، جس میں ملیریا پروگرام سے وابستہ ماہرین، ٹرینرز، کمیونٹی ہیلتھ ورکرز (CHWs) اور کمیونٹی ریسپانس پرسنز (CRPs) نے شرکت کی۔

انڈس ہسپتال (IHHN) کے پروگرام آفیسر ہارون احمد، BRSP ملیریا پروگرام کے DPC محمد اسحاق اور ماسٹر ٹرینر امیر عزیز نے بطور ٹرینرز شرکا کو ملیریا سمیت مختلف متعدی امراض کی روک تھام، بروقت تشخیص، ابتدائی طبی معاونت، مریضوں کی رہنمائی اور کمیونٹی کی سطح پر بیماریوں کے مؤثر کنٹرول کی تربیت دی۔

ڈاکٹر فہیم خان نے کہا کہ ملیریا، ایچ آئی وی اور ٹی بی جیسے خطرناک متعدی امراض کو مؤثر احتیاطی تدابیر، بروقت تشخیص، علاج اور عوامی شعور کے ذریعے بڑی حد تک کنٹرول کیا جا سکتا ہے۔ بیماریوں کے خلاف جنگ صرف محکمہ صحت کی ذمہ داری نہیں بلکہ معاشرے کے ہر فرد، بالخصوص کمیونٹی ہیلتھ ورکرز اور کمیونٹی ریسپانس پرسنز کا کردار انتہائی اہم ہے۔

انہوں نے کہا کہ معلومات اور شعور ہی بیماریوں کی روک تھام کا مؤثر ذریعہ ہیں، اس لیے فیلڈ میں کام کرنے والے CHWs اور CRPs عوام کو ملیریا سے بچاؤ، مچھر کی افزائش کے خاتمے، صفائی ستھرائی، احتیاطی تدابیر اور بروقت طبی معائنہ و علاج کے بارے میں آگاہی دیں۔ انہوں نے کہا کہ صوبائی وزیر صحت اور سیکرٹری صحت کے وژن اور ہدایات کی روشنی میں محکمہ صحت معیاری طبی سہولیات کے ساتھ متعدی امراض کی روک تھام اور کمیونٹی سطح پر آگاہی کے لیے اقدامات کر رہا ہے، اور تربیت یافتہ کمیونٹی ورکرز بیماریوں کی بروقت نشاندہی میں کلیدی کردار ادا کر سکتے ہیں۔

تربیتی سیشن میں عملی مثالوں، سوال و جواب اور فیلڈ کیسز کے ذریعے بیماریوں کی شناخت، ابتدائی نگہداشت، بروقت ریفرل اور کمیونٹی آگاہی کے طریقہ کار سے آگاہ کیا گیا۔ ٹرینرز نے کہا کہ کمیونٹی کی فعال شمولیت کے بغیر متعدی امراض پر مکمل قابو مشکل ہے۔ اختتام پر ڈاکٹر فہیم خان نے ٹرینرز اور شرکا کی کاوشوں کو سراہا اور امید ظاہر کی کہ تربیت یافتہ عملہ ملیریا سمیت متعدی امراض کی روک تھام میں بھرپور کردار ادا کرے گا۔

تصویر: بشکریہ ڈی جی پی آر بلوچستان