زیارت، ہرنائی اور سنجاوی کے وفود کی صوبائی وزیر حاجی نور محمد دمڑ سے ملاقات، مسائل سے آگاہ کیا

کوئٹہ: صوبائی وزیر کموڈیٹی منیجمنٹ ڈیپارٹمنٹ و چیئرمین بلوچستان فوڈ اتھارٹی حاجی نور محمد دمڑ سے زیارت، ہرنائی اور سنجاوی کے مختلف علاقوں سے تعلق رکھنے والے وفود اور عوامی نمائندوں نے ان کے دفتر میں ملاقات کی۔

وفود نے اپنے اپنے علاقوں کو درپیش مسائل، ترقیاتی منصوبوں اور عوامی ضروریات سے صوبائی وزیر کو آگاہ کیا۔ مختلف علاقوں سے آئے سائلین نے بھی اپنے انفرادی اور اجتماعی مسائل پیش کیے، جنہیں حاجی نور محمد دمڑ نے توجہ اور ہمدردی سے سنا۔

صوبائی وزیر نے مسائل کے حل کے لیے ضروری اقدامات اٹھانے اور جائز مسائل کو ترجیحی بنیادوں پر حل کرنے کی یقین دہانی کرائی، اور بعض مسائل کے حوالے سے متعلقہ حکام کو فوری کارروائی اور پیش رفت کی ہدایات بھی جاری کیں۔

حاجی نور محمد دمڑ نے کہا کہ عوام کے مسائل کا حل اور ان کی فلاح و بہبود ہماری اولین ترجیح ہے۔ زیارت، ہرنائی اور سنجاوی سمیت حلقے کے دور دراز علاقوں کے عوام سے مسلسل رابطہ رکھا جا رہا ہے اور ان کے بنیادی مسائل کے حل کے لیے تمام دستیاب وسائل بروئے کار لائے جائیں گے۔ انہوں نے کہا کہ عوام کی خدمت کو اپنا فرض سمجھتا ہوں اور میرے دفتر کے دروازے لوگوں کے لیے ہمیشہ کھلے ہیں۔

تصویر: بشکریہ ڈی جی پی آر بلوچستان