جیولرز، بیکریاں، پراپرٹی ڈیلرز اور یوٹیوبرز بلوچستان ریونیو اتھارٹی کے ٹیکس دائرے میں لانے کا فیصلہ

کوئٹہ: صوبائی وزیر خزانہ و معدنیات میر شعیب نوشیروانی کی زیرِ صدارت بلوچستان ریونیو اتھارٹی (BRA) کی کارکردگی، ٹیکس وصولی میں بہتری اور ریونیو بیس کو وسیع کرنے کے حوالے سے اہم اجلاس منعقد ہوا، جس میں سیکرٹری خزانہ جہانگیر کاکڑ، چیئرمین بلوچستان ریونیو اتھارٹی عبداللہ خان اور دیگر متعلقہ حکام نے شرکت کی۔ اجلاس میں گزشتہ اجلاس کے فیصلوں اور ان پر پیش رفت کا تفصیلی جائزہ لیا گیا۔

اجلاس میں فیصلہ کیا گیا کہ کمپنیوں، ہوٹلز، ہسپتالوں اور دیگر شعبوں کے آڈٹ کے عمل کو مزید تیز، مؤثر اور شفاف بنایا جائے گا تاکہ ٹیکس نظام میں شفافیت یقینی بناتے ہوئے صوبائی ریونیو میں اضافہ کیا جا سکے۔ اجلاس کو بتایا گیا کہ گوادر میں بلوچستان ریونیو اتھارٹی کا دفتر فعال کر دیا گیا ہے، جس سے گوادر اور گردونواح میں ٹیکس امور کی نگرانی اور ٹیکس دہندگان کو خدمات کی فراہمی میں بہتری آئے گی۔

نئے شعبے ٹیکس نیٹ میں

جیولرز، بیکریوں، پراپرٹی ڈیلرز، کار شورومز، پانی فراہم کرنے والی کمپنیوں اور دیگر متعلقہ کاروباری شعبوں کو بلوچستان ریونیو اتھارٹی کے ٹیکس دائرۂ کار میں لانے کا فیصلہ بھی کیا گیا، جبکہ یوٹیوبرز اور آن لائن کاروبار سے وابستہ افراد و اداروں کو قانونی تقاضوں کے مطابق ٹیکس دائرۂ کار میں شامل کرنے کے اقدامات تیز کرنے پر اتفاق ہوا۔

میر شعیب نوشیروانی نے کہا کہ بلوچستان میں ٹیکس نیٹ کو وسیع کرنا، ٹیکس وصولی کے نظام کو شفاف بنانا اور کاروباری سرگرمیوں کو دستاویزی شکل دینا حکومت کی ترجیحات میں شامل ہے۔ انہوں نے ہدایت کی کہ ٹیکس قوانین پر مؤثر عمل درآمد کے ساتھ ٹیکس دہندگان کو سہولیات کی فراہمی بھی یقینی بنائی جائے۔ انہوں نے کہا کہ جدید کاروباری رجحانات اور آن لائن معیشت کو ٹیکس نظام کا حصہ بنانا وقت کی اہم ضرورت ہے، جبکہ تمام اقدامات قانون اور شفافیت کے اصولوں کے مطابق ہونے چاہییں۔

اسی سلسلے میں بلوچستان ریونیو اتھارٹی کے ماہانہ پیش رفت کے جائزہ اجلاس میں چیئرپرسن BRA نے ٹیکس وصولی میں پیش رفت، جاری اصلاحات، فنانس ایکٹ میں ترامیم کے محصولات پر اثرات اور مزید بہتری کی تجاویز پر بریفنگ دی۔ وزیر خزانہ نے ہدایت کی کہ ٹیکس دہندگان کو رجسٹریشن اور ریٹرن فائلنگ کے مراحل میں زیادہ سے زیادہ سہولت دی جائے، انہیں بلوچستان سیلز ٹیکس آن سروسز ایکٹ 2015 کے تحت ذمہ داریاں پوری کرنے کا مؤثر موقع فراہم کیا جائے اور عدم تعمیل کرنے والوں کے خلاف قانون کے مطابق انفورسمنٹ کو مزید مؤثر بنایا جائے۔

تصویر: بشکریہ ڈی جی پی آر بلوچستان