بلوچستان سرمایہ کاری بورڈ سے ڈرائی فروٹ ایسوسی ایشن کے چیئرمین حاجی فوجان کی ملاقات، کاروباری مسائل پر بات چیت

کوئٹہ: معروف کاروباری شخصیت اور آل پاکستان ڈرائی فروٹ ایسوسی ایشن کے چیئرمین حاجی فوجان نے بلوچستان سرمایہ کاری بورڈ (BBoIT) کے وائس چیئرمین بلال خان کاکڑ اور چیف ایگزیکٹو آفیسر قائم لاشاری سے ان کے دفتر میں ملاقات کی۔ ملاقات میں تاجر و کاروباری برادری کے اہم مسائل، کاروباری سرگرمیوں کے فروغ، سرمایہ کاری کے لیے سازگار ماحول اور صوبے کے مختلف شعبوں میں سرمایہ کاری کے مواقع پر تفصیلی تبادلۂ خیال ہوا۔

وائس چیئرمین بلال خان کاکڑ نے کہا کہ کاروباری برادری کے مسائل کا حل اور سرمایہ کاروں کو ہر ممکن سہولت کی فراہمی بورڈ کی ترجیحات میں شامل ہے۔ انہوں نے کہا کہ حکومت بلوچستان وزیر اعلیٰ میر سرفراز بگٹی کے وژن کے مطابق سرمایہ کاری، تجارت اور صنعت کے فروغ کے لیے عملی اقدامات کر رہی ہے، جبکہ بورڈ مقامی و غیر ملکی سرمایہ کاروں کو صوبے کے مواقع سے آگاہ کرنے اور کاروبار کے لیے سازگار ماحول فراہم کرنے میں مؤثر کردار ادا کر رہا ہے۔

ملاقات میں اتفاق کیا گیا کہ کاروباری برادری، سرمایہ کاروں اور متعلقہ اداروں کے درمیان رابطے مزید مضبوط کیے جائیں گے تاکہ بلوچستان کی معاشی صلاحیت بروئے کار لا کر روزگار کے نئے مواقع پیدا کیے جا سکیں اور صوبے کی معیشت مستحکم ہو۔ حاجی فوجان نے بورڈ کی کوششوں کو سراہتے ہوئے کاروباری برادری کے مسائل کے حل اور سرمایہ کاری کے مواقع اجاگر کرنے کے لیے مزید تعاون کی یقین دہانی کرائی۔

تصویر: بشکریہ ڈی جی پی آر بلوچستان