اسحاق ڈار کی زیر صدارت اجلاس، صدر مالدیپ کے آئندہ دورہ پاکستان کی تیاریوں کا جائزہ

اسلام آباد: نائب وزیرِاعظم و وزیرِ خارجہ سینیٹر محمد اسحاق ڈار نے مالدیپ کے صدر کے آئندہ دورہ پاکستان کی تیاریوں کا جائزہ لینے کے لیے اجلاس کی صدارت کی۔

ترجمان دفتر خارجہ کے بیان کے مطابق اجلاس میں دوطرفہ ایجنڈے کا جائزہ لیا گیا، جس میں تجارت، سرمایہ کاری، صحت، تعلیم، موسمیاتی تبدیلی، سیاحت اور سول ایوی ایشن میں تعاون کو وسعت دینے پر توجہ مرکوز کی گئی۔

اسحاق ڈار نے واضح کیا کہ یہ دورہ برادرانہ تعلقات کو مزید مستحکم کرنے اور باہمی طور پر مفید شراکت داری کو آگے بڑھانے کا موقع فراہم کرے گا۔

انہوں نے متعلقہ تمام افراد کو ہدایت کی کہ وہ قریبی ہم آہنگی کے ساتھ کام کریں تاکہ دورے کی کامیابی یقینی بنائی جا سکے اور انتظامات میں پاکستان کی روایتی گرمجوشی اور مہمان نوازی کی عکاسی ہو۔

اجلاس میں وزیرِاعظم کے معاونِ خصوصی طارق باجوہ، سیکرٹریز خارجہ امور، تجارت اور بین الصوبائی رابطہ، مالدیپ میں پاکستان کے ہائی کمشنر اور متعلقہ وزارتوں و محکموں کے سینئر افسران نے شرکت کی۔