خواجہ آصف کا سالک حسین کے پنجاب میں کرپشن کے الزامات پر ردعمل

اسلام آباد: وزیر دفاع خواجہ آصف نے مسلم لیگ (ق) کے رہنما اور وفاقی وزیر چودھری سالک حسین کے پنجاب میں کرپشن سے متعلق بیان پر ردعمل دیتے ہوئے کہا ہے کہ یہ بات ان کی محدود سیاسی سمجھ سے بالاتر ہے۔ انہوں نے یہ بات سماجی رابطے کی ویب سائٹ ایکس پر اپنے پیغام میں کہی۔

خواجہ آصف کے مطابق چودھری سالک ان کے لیے انتہائی قابلِ احترام ہیں اور وہ ان کے بزرگوں کو بھی اپنے بزرگوں کی طرح عزت دیتے ہیں۔

ان کا کہنا تھا کہ کرپشن معاشرے کا سب سے بڑا مسئلہ ہے اور اس سے نجات وفاقی و صوبائی سیاسی قیادت کی مشترکہ ذمہ داری ہے۔ انہوں نے یاد دلایا کہ سالک حسین وفاقی حکومت کا حصہ ہیں جبکہ وفاق اور پنجاب دونوں میں مسلم لیگ (ن) کی حکومت ہے۔

خواجہ آصف نے کہا کہ اگر یہ بیان مریم نواز کی حکومت کو نشانہ بنانے، پنجاب اور مرکز میں اپنے لیے جگہ بنانے اور سیاسی مستقبل محفوظ کرنے کے کسی آئندہ سیاسی ایجنڈے کا حصہ ہے تو پھر بات سمجھ میں آتی ہے۔

انہوں نے مریم نواز کی کارکردگی کی تعریف کرتے ہوئے کہا کہ پنجاب کے شہروں اور دیہات میں جاری خدمت اور صوبائی حکومت کے قائم کردہ نئے معیار مخالفین کے لیے بہت مشکل چیلنج ثابت ہوں گے۔

پاکستان ٹوڈے کے مطابق سالک حسین نے پیر کو ایک نجی ٹی وی چینل کے انٹرویو میں سابق وزیراعلیٰ پنجاب چودھری پرویز الٰہی کی تعریف کی اور مریم نواز کی قیادت میں صوبائی انتظامیہ پر تنقید کی۔ اس پر مریم نواز نے منگل کو انہیں پانچ ارب روپے ہرجانے کا نوٹس بھیجا اور الزامات واپس لینے کا مطالبہ کیا۔