اسحاق ڈار کا جماعت اسلامی کے قائم مقام امیر سے رابطہ، پیٹرولیم لیوی پر ٹیکنیکل کمیٹیوں کا اجلاس آج

اسلام آباد: نائب وزیراعظم و وزیر خارجہ اسحاق ڈار نے قائم مقام امیر جماعت اسلامی لیاقت بلوچ سے رابطہ کیا۔ رابطے میں پیٹرولیم لیوی کے خاتمے اور عوام کو ریلیف فراہم کرنے سے متعلق امور پر تبادلہ خیال کیا گیا۔

لیاقت بلوچ کے مطابق حکومت اور جماعت اسلامی کی ٹیکنیکل کمیٹیوں کا اجلاس آج منعقد ہوگا، جس میں پیٹرولیم لیوی کے خاتمے اور عوام کو ریلیف دینے کے لیے مختلف تجاویز اور متعلقہ امور کا جائزہ لیا جائے گا۔

انہوں نے بتایا کہ اس معاملے پر ماہرین کا اجلاس بدھ کو طے تھا، تاہم حکومت نے متعلقہ ڈیٹا کی حتمی تیاری کے پیش نظر ایک دن کی مہلت طلب کی، جس کے بعد اجلاس آج (جمعرات کو) منعقد کرنے کا فیصلہ کیا گیا۔

لیاقت بلوچ نے مزید بتایا کہ حکومت اور جماعت اسلامی کی جانب سے طے پانے والے مسودے کا امیر جماعت اسلامی حافظ نعیم الرحمان خود جائزہ لیں گے تاکہ تمام تجاویز اور نکات کا تفصیلی مطالعہ کیا جا سکے۔

ان کا کہنا تھا کہ حافظ نعیم الرحمان اور جماعت اسلامی کے دیگر قائدین سے مشاورت کے بعد ہی آئندہ کے لائحہ عمل کا اعلان کیا جائے گا۔

حکومتی اور جماعت اسلامی کی ٹیکنیکل کمیٹیوں کے آئندہ اجلاس میں پیٹرولیم لیوی کے خاتمے اور مہنگائی کے دباؤ سے ریلیف فراہم کرنے سے متعلق تجاویز پر پیش رفت متوقع ہے۔