زیلنسکی: یوکرین پر ایک ہزار ڈرونز سے حملے، پوتن کا مقصد ملک کا مکمل خاتمہ

کیف: یوکرینی صدر زیلنسکی نے کہا ہے کہ گزشتہ روز یوکرین پر ایک ہزار ڈرونز سے حملے کیے گئے اور پوتن یوکرین کو تباہ کرنا چاہتے ہیں۔

ایک بیان میں یوکرینی صدر نے کہا کہ امریکا کہتا ہے کہ زیلنسکی سے بات کرنا مشکل ہے جبکہ پوتن سے معاملات طے کرنا آسان ہے۔

زیلنسکی کے مطابق پوتن ہماری خودمختاری اور علاقائی سالمیت کا احترام نہیں کرتے، بلکہ یوکرین کو ایک آزاد ملک اور قوم تسلیم ہی نہیں کرتے۔

ڈونباس اور کیف کا سوال

یوکرینی صدر نے کہا کہ یہ سمجھنا غلط ہے کہ پوتن صرف مشرقی یوکرین پر قبضہ چاہتے ہیں۔ ان کے بقول اگر پوتن ڈونباس چاہتے ہیں تو روس نے کیف پر قبضے کی کوشش کیوں کی، کیف ڈونباس میں نہیں بلکہ یوکرین کا دارالحکومت ہے۔

زیلنسکی نے کہا کہ دارالحکومت کے بغیر ریاست کا وجود برقرار نہیں رہ سکتا۔ ان کا کہنا تھا کہ یوکرین تباہ ہوا تو 2 کروڑ شہری یورپ منتقل ہونے پر مجبور ہو جائیں گے۔

یوکرینی صدر نے مزید کہا کہ پوتن کا اصل مقصد یوکرین کا مکمل خاتمہ ہے۔