حملوں کے خدشے پر امریکا اور برطانیہ کی شہریوں کو سعودی عرب کے سفر میں احتیاط کی ہدایت

لندن: برطانیہ اور امریکا نے سعودی عرب میں سکیورٹی خدشات اور ہوائی اڈوں پر ممکنہ مزید حملوں کے پیش نظر اپنے شہریوں کو محتاط رہنے کی ہدایت جاری کر دی ہے۔

برطانوی حکومت نے خبردار کیا کہ مملکت میں سکیورٹی صورتحال کے باعث فضائی سفر متاثر ہونے، پروازیں منسوخ ہونے اور سفری مشکلات میں اضافے کا خدشہ ہے۔ امریکی سفارت خانے نے سعودی ہوائی اڈوں کے استعمال کے دوران انتہائی احتیاط برتنے پر زور دیا ہے۔

برطانیہ کی ہدایات

برطانیہ کی وزارت خارجہ، دولت مشترکہ و ترقی نے شہریوں کو یمن کی سرحد سے 10 کلومیٹر کے اندر واقع علاقوں میں ہر قسم کے سفر سے گریز کرنے اور سعودی عرب کے دیگر حصوں میں صرف ناگزیر سفر کرنے کا مشورہ دیا۔ حکام نے خبردار کیا کہ اگر شہری سرکاری سفری ہدایات کے برخلاف سفر کرتے ہیں تو ان کی ٹریول انشورنس غیر مؤثر ہو سکتی ہے۔

وزارت خارجہ نے 10 اکتوبر 2026 کو مقامی وقت کے مطابق سہ پہر تقریباً 3 بجے پیش آنے والے ایک سنگین واقعے کے بعد برطانوی شہریوں کو ریاض کے شاہ خالد انٹرنیشنل ایئرپورٹ سے دور رہنے کی ہدایت کی ہے۔ مسافروں کو سعودی حکام کی ہدایات پر عمل کرنے اور اس وقت تک ایئرپورٹ جانے سے گریز کرنے کا مشورہ دیا گیا ہے جب تک اسے محفوظ قرار نہیں دے دیا جاتا۔

برطانوی وزارت خارجہ نے خدشہ ظاہر کیا ہے کہ سعودی عرب کے ہوائی اڈوں پر مزید حملے ہو سکتے ہیں، جس کے نتیجے میں پروازوں کے شیڈول میں خلل اور منسوخیوں کا سامنا کرنا پڑ سکتا ہے۔

سعودی عرب سے روانہ ہونے کے خواہش مند شہریوں کو مشورہ دیا گیا ہے کہ وہ کسی پڑوسی ملک تک زمینی راستے سے سفر کرنے اور وہاں سے فضائی سفر اختیار کرنے کے امکان پر غور کریں۔ تاہم شہریوں کو روانگی سے قبل متعلقہ ممالک میں داخلے اور وہاں سے نکلنے کے قواعد و ضوابط کی تصدیق کرنے کی ہدایت بھی کی گئی ہے۔

برطانوی وزارت خارجہ نے مزید خبردار کیا ہے کہ خطے میں جاری کشیدگی کے باعث ایران کی جانب سے دوبارہ حملوں کا امکان برقرار ہے، باوجود اس کے کہ امریکا اور ایران نے 17 جون کو مفاہمت کی ایک یادداشت کا اعلان کیا تھا۔

امریکی سفارت خانے کا الرٹ

ریاض میں امریکی سفارت خانے نے سعودی عرب کے ہوائی اڈوں پر حالیہ میزائل اور ڈرون حملوں کے بعد امریکی شہریوں کے لیے سکیورٹی الرٹ جاری کیا ہے۔ سفارت خانے نے زور دیا ہے کہ شہری سعودی ہوائی اڈوں کا استعمال کرتے وقت انتہائی احتیاط برتیں اور سعودی حکام کی جانب سے جاری کردہ سکیورٹی ہدایات پر عمل کریں۔

سفارت خانے کے مطابق ریاض کے شاہ خالد انٹرنیشنل ایئرپورٹ پر آپریشنز تاحال معطل ہیں، جبکہ جدہ اور دمام کے ہوائی اڈوں پر بعض تاخیر اور پروازوں کی منسوخی کے باوجود سرگرمیاں جاری ہیں۔

امریکی حکومت کے ملازمین کو بھی سعودی عرب کے کسی ہوائی اڈے کے استعمال کے لیے چیف آف مشن سے خصوصی اجازت حاصل کرنے کی ہدایت کی گئی ہے۔

سفارت خانے نے امریکی شہریوں کو سعودی سول ڈیفنس کی جانب سے جاری ہونے والے انتباہات پر نظر رکھنے اور ایئرپورٹ جانے سے پہلے اپنی متعلقہ ایئرلائن اور ہوائی اڈے سے پرواز کی تازہ ترین صورتحال معلوم کرنے کا مشورہ دیا ہے۔