جعفرآباد: چیف انجینئر بشیر ناصر کا روجھان-خانپور روڈ، سیوریج لائن اور کیٹل فارم تھانے کی چار دیواری کا معائنہ

جعفرآباد: وزیر اعلیٰ بلوچستان میر سرفراز بگٹی، چیف سیکرٹری بلوچستان شکیل قادر خان، صوبائی وزیر مواصلات و تعمیرات میر سلیم خان کھوسہ اور صوبائی سیکرٹری سی اینڈ ڈبلیو بابر خان کے احکامات کی روشنی میں چیف انجینئر مواصلات و تعمیرات نصیرآباد زون بشیر ناصر نے ضلع جعفرآباد میں جاری مختلف ترقیاتی اسکیموں کا تفصیلی جائزہ لیا۔

دورے کے دوران انہوں نے روجھان ٹو خانپور روڈ، جی او آر کالونی ڈیرہ اللہ یار مین سیوریج لائن، پری فیب اور کیٹل فارم پولیس اسٹیشن کی چار دیواری سمیت دیگر منصوبوں کا معائنہ کیا اور جاری تعمیراتی امور، کام کے معیار اور پیش رفت کے بارے میں متعلقہ افسران سے آگاہی حاصل کی۔ اس موقع پر سپرنٹنڈنگ انجینئر ارسلا رند، ایگزیکٹو انجینئر عتیق الرحمن اور سب ڈویژنل آفیسر اعجاز بہرانی سمیت دیگر افسران بھی موجود تھے۔

چیف انجینئر بشیر ناصر نے ہدایت کی کہ ترقیاتی منصوبوں میں تعمیراتی معیار پر کوئی سمجھوتہ نہ کیا جائے اور تمام اسکیمیں مقررہ معیار اور رفتار کے مطابق مکمل کی جائیں۔ انہوں نے کہا کہ پائیدار تعمیراتی عمل نہ صرف عوام کے وسیع تر مفاد میں ہے بلکہ اس سے محکمہ مواصلات و تعمیرات کی کارکردگی اور مورال بھی وابستہ ہے۔

انہوں نے انجینئرز کو تعمیراتی امور کی کڑی نگرانی اور منصوبوں کی بروقت تکمیل کے لیے ذمہ داریاں ایمانداری اور پیشہ ورانہ انداز میں ادا کرنے کی ہدایت کی اور کہا کہ عوامی مفاد کے منصوبوں میں کسی قسم کی غفلت یا کوتاہی ہرگز برداشت نہیں کی جائے گی۔

تصویر: بشکریہ ڈی جی پی آر بلوچستان