ڈسٹرکٹ پولیس کوئٹہ میں 349 جوانوں کی بھرتی مکمل، 44 خواتین اور 7 اقلیتی امیدوار بھی شامل

کوئٹہ: ایڈیشنل آئی جی پی و کمانڈنٹ بلوچستان کانسٹیبلری اشفاق احمد کی سربراہی میں قائم ریکروٹمنٹ کمیٹی اور ڈپٹی کمانڈنٹ ڈی آئی جی پولیس محترمہ شہلا قریشی کی زیر نگرانی ڈسٹرکٹ پولیس کوئٹہ میں جوانوں کی بھرتی کا عمل شفاف انداز میں میرٹ کی بنیاد پر مکمل کر لیا گیا۔ بھرتی کے دوران تمام امیدواروں کے لیے یکساں مواقع اور مقررہ قواعد و ضوابط پر عملدرآمد یقینی بنایا گیا۔

بھرتی کے نتیجے میں جنرل کیڈر میل کوٹہ کے تحت 298، لیڈیز کوٹہ میں 44 اور اقلیتی کوٹہ کے تحت 7 جوان بھرتی کیے گئے، یوں مجموعی طور پر 349 جوان ڈسٹرکٹ پولیس کوئٹہ کا حصہ بن گئے۔

حکام کے مطابق پورے عمل میں میرٹ، شفافیت اور مقررہ طریقہ کار کو بنیادی اہمیت دی گئی اور امیدواروں کی اہلیت اور دیگر تقاضوں کو مدنظر رکھ کر انتخاب کیا گیا۔ بھرتی کی نگرانی اعلیٰ پولیس حکام نے کی تاکہ کسی بھی مرحلے پر میرٹ اور شفافیت پر سمجھوتہ نہ ہو۔

پولیس حکام نے کہا کہ نئی بھرتیوں سے ڈسٹرکٹ پولیس کوئٹہ کی افرادی قوت میں اضافہ ہوگا اور فورس کو مزید منظم، فعال اور مستحکم بنانے میں مدد ملے گی۔ نئے جوانوں کی شمولیت سے کوئٹہ شہر میں امن و امان کے قیام، جرائم کی روک تھام، شہریوں کے جان و مال کے تحفظ اور پولیسنگ کے دیگر فرائض کے لیے دستیاب نفری بڑھے گی۔

حکام کے مطابق بلوچستان پولیس میں بھرتیوں میں میرٹ اور شفافیت کو بنیادی اصول کے طور پر برقرار رکھا جا رہا ہے تاکہ اہل، باصلاحیت اور مستحق نوجوانوں کو پولیس فورس میں خدمات انجام دینے کے مواقع ملیں۔

تصویر: بشکریہ ڈی جی پی آر بلوچستان