وزیر اعلیٰ سرفراز بگٹی کا تبادلہ ہونے والے ڈی آئی جی ہیڈکوارٹرز حسن اسد علوی کے لیے لیٹر آف اپریسی ایشن کا اعلان

کوئٹہ: وزیر اعلیٰ بلوچستان میر سرفراز بگٹی نے بلوچستان سے تبادلہ ہونے والے سینئر پولیس افسر اور ڈی آئی جی ہیڈکوارٹرز حسن اسد علوی کی خدمات کو سراہتے ہوئے ان کے لیے لیٹر آف اپریسی ایشن کا اعلان کیا ہے۔

جمعہ کو بلوچستان پولیس ڈیجیٹل انیشیٹوز کی افتتاحی تقریب کے موقع پر وزیر اعلیٰ نے پولیس سروس آف پاکستان کے سینئر افسر حسن اسد علوی کی کارکردگی کی تعریف کی اور کہا کہ بلوچستان میں تعیناتی کے دوران انہوں نے اپنی پیشہ ورانہ ذمہ داریاں انتہائی احسن انداز میں انجام دیں اور پولیس کے نظام میں بہتری، جدید ٹیکنالوجی کے فروغ اور ادارہ جاتی استعدادِ کار بڑھانے میں نمایاں کردار ادا کیا۔

وزیر اعلیٰ نے کہا کہ حسن اسد علوی ایک قابل، محنتی اور پیشہ ور افسر ہیں جنہوں نے بلوچستان پولیس میں جدیدیت اور ڈیجیٹلائزیشن کے عمل کو آگے بڑھایا۔ ان کی خدمات قابلِ تحسین ہیں، اسی لیے حکومت بلوچستان ان کی خدمات کے اعتراف میں انہیں لیٹر آف اپریسی ایشن دے گی۔ وزیر اعلیٰ نے ان کے لیے نیک خواہشات کا اظہار کرتے ہوئے امید ظاہر کی کہ وہ مستقبل میں بھی اپنی صلاحیتوں اور تجربے سے ملک و قوم کی خدمت جاری رکھیں گے۔

تصویر: بشکریہ ڈی جی پی آر بلوچستان