نصیرآباد: چیف انجینئر بشیر ناصر کا ترقیاتی منصوبوں کا معائنہ، معیار پر سمجھوتہ نہ کرنے کی ہدایت

نصیرآباد: چیف انجینئر مواصلات و تعمیرات بشیر ناصر نے نصیرآباد میں مفادِ عامہ کے جاری ترقیاتی منصوبوں کا تفصیلی جائزہ لیا۔ انہوں نے نوتال پولیس اسٹیشن کی چار دیواری اور واچ ٹاورز، انٹیگریٹڈ ڈویلپمنٹ پیکج برائے ڈیرہ مراد جمالی، بلیک ٹاپ روڈز کوٹ سردار خان رند، فتح آباد تا بابا کوٹ، پٹ فیڈر تا قبولہ شاخ اور نیو ہسپتال میر حسن روڈ سمیت مختلف منصوبوں کا موقع پر معائنہ کیا۔

اس موقع پر سپرنٹنڈنگ انجینئر بی اینڈ آر فدا حسین کھوسہ، ایگزیکٹو انجینئر روڈز بوستان خان چانڈیو، خلیل احمد عمرانی اور سب ڈویژنل آفیسران نادر علی پہنور، ذوالفقار علی لہڑی، اصغر علی چنہ، عابد علی پہنور، ندیم احمد سولنگی، سجاد علی عمرانی، سمیع اللہ کاکڑ اور دیگر افسران موجود تھے، جنہوں نے منصوبوں کی پیش رفت اور معیار پر تفصیلی بریفنگ دی۔

بشیر ناصر نے ہدایت کی کہ ترقیاتی منصوبوں میں معیار پر کوئی سمجھوتہ نہ کیا جائے اور تمام منصوبے مقررہ مدت میں مکمل کیے جائیں۔ انہوں نے کہا کہ عوامی مفاد کے منصوبوں کی بروقت اور معیاری تکمیل ہماری بنیادی ذمہ داری ہے۔

انہوں نے کہا کہ وزیر اعلیٰ بلوچستان میر سرفراز بگٹی اور چیف سیکرٹری شکیل قادر خان ترقیاتی منصوبوں کو معیار کے مطابق مکمل کروانے میں خصوصی دلچسپی لے رہے ہیں، جبکہ صوبائی وزیر مواصلات و تعمیرات میر سلیم خان کھوسہ اور صوبائی سیکرٹری بابر خان کی ہدایات پر نصیرآباد کے منصوبوں کی مسلسل نگرانی کی جا رہی ہے۔ انہوں نے تمام انجینئرز کو ہدایت کی کہ تعمیراتی کام اپنی نگرانی میں مکمل کروائیں تاکہ عوام دیرپا فوائد حاصل کر سکیں۔

تصویر: بشکریہ ڈی جی پی آر بلوچستان