سیکرٹری مواصلات بابر خان کا روڈ سیکٹر منصوبوں کی سست رفتاری پر اظہارِ عدم اطمینان، کام تیز کرنے کی ہدایت

کوئٹہ: سیکرٹری مواصلات و تعمیرات بابر خان کی زیرِ صدارت بلوچستان سوشیو اکنامک ڈویلپمنٹ پراجیکٹس کے روڈ سیکٹر فیز ون اور ٹو پر پیش رفت کا جائزہ اجلاس منعقد ہوا۔ اجلاس میں پراجیکٹ کوآرڈینیٹر بلوچستان سوشیو اکنامک ڈویلپمنٹ پراجیکٹس شہزاد حسن جعفر، چیف انجینئر قلات خضدار زون عزیز اللہ کاسی، چیف انجینئر نصیر آباد زون محمد بشیر ناصر، ٹیکنیکل ایڈوائزر احسان اللہ خان دوتانی کے علاوہ جھل مگسی، شیرانی، گوادر، خضدار، نوشکی، پنجگور، ژوب، واشک اور آواران کے ضلعی انجینئرز نے شرکت کی۔

اجلاس کو روڈ سیکٹر فیز ون اور ٹو کے تمام ترقیاتی منصوبوں پر پیش رفت سے متعلق تفصیلی بریفنگ دی گئی۔

سیکرٹری مواصلات و تعمیرات بابر خان نے کہا کہ جاری ترقیاتی منصوبوں کو مالی سال کے اندر وقتِ مقررہ سے بھی پہلے مکمل کرنا محکمے کی اولین ترجیح ہے۔ انہوں نے منصوبوں کی تکمیل کی رفتار پر عدم اطمینان کا اظہار کرتے ہوئے کہا کہ اہم نوعیت کے منصوبوں پر سست روی کسی بھی صورت برداشت نہیں، اور سخت ہدایت کی کہ تمام منصوبوں پر کام کی رفتار مزید تیز اور بہتر بنائی جائے۔

انہوں نے کہا کہ صوبے کے دور دراز اور پسماندہ علاقوں میں ان منصوبوں کی تکمیل سے یہ علاقے ترقی اور خوشحالی کی جانب گامزن ہوں گے، ان کا شہروں سے رابطہ آسان ہوگا اور اس کا فائدہ ان علاقوں میں رہنے والے تمام مکاتبِ فکر کے افراد کو ہوگا۔ سیکرٹری نے کہا کہ انفراسٹرکچر کی بہتری اور ترقیاتی منصوبوں کی بروقت تکمیل سے صوبے میں ترقی اور خوشحالی آئے گی اور دور افتادہ علاقوں کو ان منصوبوں کے ثمرات جلد از جلد میسر ہوں گے۔

تصویر: بشکریہ ڈی جی پی آر بلوچستان