بلوچستان بھر میں منڈیوں، بس ٹرمینلز اور مویشی منڈیوں کے منصوبوں کا جائزہ، سیکرٹری مواصلات بابر خان کی ہدایات

کوئٹہ: سیکرٹری مواصلات و تعمیرات بابر خان کی زیرِ صدارت صوبے بھر میں پھل و سبزی منڈیوں، غلہ منڈیوں، بس ٹرمینلز اور مویشی منڈیوں کی فعالیت اور ان میں سہولیات کی فراہمی سے متعلق جاری ترقیاتی منصوبوں پر پیش رفت کا جائزہ لینے کے لیے اہم اجلاس منعقد ہوا۔

اجلاس میں تمام چھ زونز کے چیف انجینئرز، افسران، کنسلٹنٹس اور ایگزیکٹو انجینئرز نے بذریعہ زوم شرکت کی۔ متعلقہ حکام نے مختلف منصوبوں پر جاری پیش رفت، درپیش چیلنجز اور آئندہ کے لائحہ عمل پر تفصیلی بریفنگ دی۔

سیکرٹری بابر خان نے کہا کہ بلوچستان کی معیشت میں زراعت اور لائیو اسٹاک کے شعبوں کو بنیادی اہمیت حاصل ہے، لہٰذا ان شعبوں کو جدید تقاضوں سے ہم آہنگ کرنے کے لیے مارکیٹ انفراسٹرکچر کی ترقی ناگزیر ہے۔ حکومت کا مقصد کسانوں، تاجروں اور کاروباری طبقے کو جدید اور بہتر سہولیات فراہم کرنا ہے تاکہ زرعی پیداوار اور مویشیوں کی تجارت کو مزید فروغ دیا جا سکے۔

انہوں نے کہا کہ جاری منصوبوں کے تحت پھل و سبزی منڈیوں میں صفائی ستھرائی، نکاسیٔ آب کا مؤثر نظام، کولڈ اسٹوریج، پارکنگ ایریاز اور ٹرانسپورٹ کی جدید سہولیات فراہم کی جا رہی ہیں، جس سے زرعی اجناس کا معیار برقرار رکھنے میں مدد ملے گی اور کسانوں اور تاجروں کو بہتر کاروباری ماحول میسر آئے گا۔

چیف انجینئرز ہفتہ وار پیش رفت کا جائزہ لیں

سیکرٹری مواصلات و تعمیرات نے ہدایت کی کہ تمام منصوبوں کی بروقت تکمیل کے لیے مزید تیزی سے کام کیا جائے اور چیف انجینئرز خود بھی ہفتہ وار ان منصوبوں کی پیش رفت کا جائزہ لیا کریں۔ انہوں نے واضح کیا کہ جہاں کہیں تکنیکی یا انتظامی مسائل درپیش ہیں انہیں فوری حل کیا جائے تاکہ ترقیاتی منصوبوں میں تاخیر نہ ہو۔

انہوں نے منصوبوں کی پیش رفت اور معیار کے مؤثر جائزے کے لیے خصوصی ٹیکنیکل ٹیم تشکیل دینے کی بھی ہدایت کی، جو صوبے بھر میں جاری منصوبوں کا معائنہ کر کے ان کی موجودہ صورتحال، معیار اور پیش رفت پر جامع رپورٹ تیار کر کے سیکرٹری آفس میں پیش کرے گی۔

بابر خان نے کہا کہ حکومتِ بلوچستان کی ہدایات کے مطابق تمام ترقیاتی منصوبوں کو مقررہ وقت میں مکمل کرنے اور عوام کو بہتر سہولیات کی فراہمی کے لیے ہر ممکن اقدامات کیے جائیں گے۔

تصویر: بشکریہ ڈی جی پی آر بلوچستان