اوستہ محمد اور نصیرآباد پولیس کو گشت کے لیے 31 نئی CG-125 موٹر سائیکلیں فراہم

اوستہ محمد: وزیر اعلیٰ بلوچستان میر سرفراز بگٹی اور آئی جی پولیس بلوچستان محمد طاہر کی خصوصی ہدایات پر پولیسنگ کے نظام میں جدت لانے، اسے فعال و مستحکم بنانے اور گشت کے نظام کو مزید مؤثر کرنے کے لیے اوستہ محمد اور نصیرآباد پولیس کو مجموعی طور پر 31 نئی CG-125 موٹر سائیکلیں فراہم کر دی گئیں۔

اوستہ محمد میں جرائم کی روک تھام، پولیس گشت اور بروقت رسپانس کو مؤثر بنانے کے لیے پولیس کو 15 نئی CG-125 موٹر سائیکلیں دی گئیں۔ ایس پی اوستہ محمد حافظ معاذ الرحمٰن نے موٹر سائیکلوں کی چابیاں متعلقہ تھانوں کے ایس ایچ اوز اور انچارج افسران کے حوالے کیں۔

ایس پی اوستہ محمد نے افسران کو ہدایت کی کہ موٹر سائیکلوں کی مناسب دیکھ بھال اور بروقت مرمت یقینی بنائی جائے، اور انہیں صرف پولیس گشت اور سرکاری فرائض کی انجام دہی کے لیے ذمہ دارانہ اور مؤثر انداز میں استعمال کیا جائے۔ انہوں نے کہا کہ نئی موٹر سائیکلوں سے شہر میں پولیس گشت کا نظام مزید بہتر ہوگا، جس سے جرائم کی روک تھام، بروقت پولیس رسپانس اور عوام کے تحفظ میں مدد ملے گی۔

نصیرآباد پولیس کو 16 موٹر سائیکلیں

دوسری جانب نصیرآباد پولیس کو بھی 16 نئی CG-125 موٹر سائیکلیں فراہم کی گئی ہیں۔ ایس ایس پی نصیرآباد اسد خان ناصر نے پولیس تھانہ سٹی، صدر، منگولی، منجھوشوری، میر حسن اور 15 مددگار کے اہلکاروں کو موٹر سائیکلیں فراہم کیں۔

ایس ایس پی نصیرآباد اسد خان ناصر نے کہا کہ نئی موٹر سائیکلوں کی فراہمی سے پولیس گشت کا دائرہ اور دورانیہ بڑھنے کے ساتھ ساتھ جرائم کی روک تھام اور فوری رسپانس کی صلاحیت میں بھی اضافہ ہوگا۔ انہوں نے کہا کہ جدید وسائل کی فراہمی سے پولیس کی استعدادِ کار بہتر ہوگی اور عوام کو بروقت و مؤثر پولیس سروسز کی فراہمی میں مزید بہتری آئے گی۔

تصویر: بشکریہ ڈی جی پی آر بلوچستان