وزیر اعلیٰ سرفراز بگٹی کی جانب سے یومِ آزادی پر بہترین کارکردگی کے لیے بلوچستان کانسٹیبلری کو ایک لاکھ روپے انعام

کوئٹہ: وزیر اعلیٰ بلوچستان سرفراز احمد خان بگٹی نے یومِ آزادی 14 اگست کے موقع پر بہترین کارکردگی کا مظاہرہ کرنے والے بلوچستان کانسٹیبلری کے گھوڑا اور بینڈ اسٹاف کے لیے ایک لاکھ روپے نقد انعام دیا۔ وزیر اعلیٰ کی جانب سے دیے گئے نقد انعامات ایڈیشنل آئی جی پی کمانڈنٹ بلوچستان کانسٹیبلری اشفاق احمد نے جوانوں میں تقسیم کیے۔

اس سے قبل وزیر اعلیٰ بلوچستان کے چیف سیکیورٹی آفیسر ہارون خان نے 14 اگست کی تقریبات کے دوران بہترین کارکردگی دکھانے والے اہلکاروں کی خدمات کو سراہتے ہوئے نقد انعام کا چیک ایڈیشنل آئی جی پولیس کمانڈنٹ بی سی اشفاق احمد خان کے حوالے کیا۔ انہوں نے کہا کہ یہ نقد انعام دراصل آپ کے محکمے کی پیشہ ورانہ صلاحیتوں کا اعتراف ہے۔

نقد انعام ملنے پر بلوچستان کانسٹیبلری کے جوانوں میں خوشی کی لہر دوڑ گئی۔ جوانوں نے وزیر اعلیٰ کی جانب سے حوصلہ افزائی پر اظہارِ تشکر کرتے ہوئے کہا کہ انعام اور پذیرائی سے ان کے حوصلے مزید بلند ہوئے ہیں اور وہ آئندہ بھی قومی و سرکاری تقریبات میں محنت، نظم و ضبط اور بہترین کارکردگی کا مظاہرہ جاری رکھیں گے۔

ایڈیشنل آئی جی پی کمانڈنٹ بلوچستان کانسٹیبلری اشفاق احمد نے جوانوں کی کارکردگی کو سراہتے ہوئے کہا کہ اہلکاروں کی حوصلہ افزائی سے فورس کا مورال بلند ہوتا ہے اور بہترین کارکردگی کا اعتراف جوانوں میں مزید جذبۂ خدمت پیدا کرتا ہے۔

تصویر: بشکریہ ڈی جی پی آر بلوچستان