ڈی سی خضدار عبدالرزاق ساسولی: شہداء، اساتذہ، ہیلتھ ورکرز اور کسان قوم کے حقیقی ہیروز ہیں

خضدار: ڈپٹی کمشنر خضدار عبدالرزاق ساسولی نے گرلز ماڈل ہائی اسکول خضدار میں یومِ آزادی کی تقریب سے خطاب کرتے ہوئے شرکاء کو 79ویں یومِ آزادی کی مبارکباد دی اور کہا کہ آزادی کسی قوم کو پلیٹ میں نہیں ملتی، اس کے لیے قربانیاں دینی پڑتی ہیں۔ ہمارے آباؤ اجداد نے قربانیاں دیں اور ان کا نام تاریخ میں سنہرے حروف سے لکھا جاتا ہے۔

انہوں نے کہا کہ آج کے دن انہوں نے مناسب سمجھا کہ قوم کے حقیقی ہیروز کا ذکر کریں، جو ان کی نظر میں پانچ چھ شعبوں کے لوگ ہیں۔ سب سے پہلے انہوں نے ان تمام شہریوں اور قانون نافذ کرنے والے اداروں کے شہداء کو سلام پیش کیا جنہوں نے جان قربان کر کے پرامن ماحول دیا، اور کہا کہ ان شہداء کے والدین، بھائی اور اہلِ خانہ ہمارے حقیقی ہیروز ہیں۔ سیکیورٹی ادارے اور جوان بھی حقیقی ہیرو ہیں جو آج بھی پنجگور، زہری، خضدار اور دور دراز علاقوں میں امن اور ملک کی عزت کے لیے سیسہ پلائی دیوار بن کر کھڑے ہیں۔

اساتذہ، ہیلتھ ورکرز اور کسان

ڈپٹی کمشنر نے کہا کہ تیسرے نمبر پر حقیقی ہیرو وہ اساتذہ ہیں جنہیں آج تعریفی اسناد دی گئیں؛ وہ تعلیم کا معیار بہتر بنانے اور جہالت کے خاتمے کے لیے دن رات محنت کر رہے ہیں۔ اس وقت سب سے بڑا مسئلہ اسکول سے باہر بچوں کا ہے جو پوری دنیا، جنوبی ایشیا، پاکستان اور سب سے زیادہ بلوچستان میں ہے، اور یہی اساتذہ اس پر کام کر رہے ہیں۔ ان میں ایک بہن کینسر سے لڑتے ہوئے بھی قومی فریضہ نبھا کر بچوں کو تعلیم دے رہی ہیں، جس پر ہمیں فخر ہے۔

انہوں نے کہا کہ صحت کے کارکن بھی فرنٹ لائن ہیروز ہیں جو دور دراز کے بنیادی اور ثانوی مراکزِ صحت میں حفاظتی ٹیکے لگا کر قابلِ بچاؤ بیماریوں سے بچا رہے ہیں۔ تپتی دھوپ میں کھیت میں محنت کرنے والا کسان اور مویشی پالنے والا چرواہا بھی ہمارے حقیقی ہیرو ہیں۔ اسی لیے صحت اور تعلیم کے فرنٹ لائن ورکرز کو بلا کر ڈویژن اور ضلع کی سطح پر ان کی خدمات کو تسلیم کیا گیا۔

عبدالرزاق ساسولی نے نوجوانوں سے کہا کہ آزادی تو مل گئی ہے لیکن ابھی بہت سے مسائل اور چیلنجز باقی ہیں؛ بے روزگاری، غربت، کرپشن، اسکول سے باہر بچوں، جہالت اور دہشت گردی کے خلاف جدوجہد انہی کو آگے بڑھانی ہے اور اس ملک کو دنیا کے نقشے پر ایک خوبصورت ملک کے طور پر ابھارنا ہے۔

تصویر: بشکریہ ڈی جی پی آر بلوچستان