کوئٹہ میں جشنِ آزادی ریلی، ڈپٹی کمشنر مہر اللہ بادینی کی قیادت میں ڈی سی آفس سے سرینا چوک تک مارچ

کوئٹہ: یومِ آزادی کے موقع پر ضلعی انتظامیہ کوئٹہ کے زیرِ اہتمام شاندار جشنِ آزادی ریلی نکالی گئی، جس کی قیادت ڈپٹی کمشنر کوئٹہ مہر اللہ بادینی نے کی۔ ریلی ڈپٹی کمشنر آفس سے شروع ہو کر سرینا چوک تک گئی۔

ریلی میں سول سوسائٹی، عوامی نمائندوں، سرکاری افسران و اہلکاروں اور شہریوں نے بڑی تعداد میں شرکت کی۔ شرکاء نے قومی پرچم اٹھا رکھے تھے اور پاکستان زندہ باد کے نعروں سے فضا کو جوش و جذبے سے بھر دیا۔

ڈپٹی کمشنر مہر اللہ بادینی نے خطاب میں کہا کہ یومِ آزادی ہمیں اپنے بزرگوں کی قربانیوں اور وطنِ عزیز کی ترقی و خوشحالی کے عزم کی یاد دلاتا ہے۔ پاکستان ہماری پہچان اور ہماری مشترکہ ذمہ داری ہے، ہمیں اتحاد، نظم و ضبط اور قومی جذبے کے ساتھ ملک کی ترقی میں اپنا کردار ادا کرنا ہوگا۔ ریلی کے اختتام پر ملکی سلامتی، استحکام اور خوشحالی کے لیے خصوصی دعائیں کی گئیں۔

تصویر: بشکریہ ڈی جی پی آر بلوچستان