نصیرآباد: ڈسٹرکٹ ڈویلپمنٹ کمیٹی کے اجلاس میں بی ایس ڈی آئی فیز ٹو کے منصوبوں کا جائزہ

نصیرآباد: ڈپٹی کمشنر نصیرآباد وریندر لعل کی زیرِ صدارت ڈسٹرکٹ ڈویلپمنٹ کمیٹی (DDC) کا اہم اجلاس منعقد ہوا، جس میں ضلع بھر میں جاری ترقیاتی منصوبوں کا تفصیلی جائزہ لیا گیا۔

اجلاس میں ایکسین بلڈنگز، ایکسین پبلک ہیلتھ انجینئرنگ (پی ایچ ای)، ایکسین روڈز، ایکسین اریگیشن اور اسسٹنٹ ڈائریکٹر لوکل گورنمنٹ سمیت دیگر متعلقہ محکموں کے افسران نے شرکت کی۔

اجلاس کے دوران بی ایس ڈی آئی فیز ٹو کے تحت جاری ترقیاتی منصوبوں کی پیش رفت، درپیش مسائل، فنڈز کے استعمال اور منصوبوں کی بروقت تکمیل سے متعلق تفصیلی بریفنگ دی گئی۔ افسران نے اپنے شعبوں کے منصوبوں کی موجودہ صورتحال، معیارِ تعمیر اور عوام کو درپیش مسائل کے حل کے اقدامات پر روشنی ڈالی۔

ڈپٹی کمشنر وریندر لعل نے اجلاس سے خطاب کرتے ہوئے کہا کہ حکومت بلوچستان عوام کو بنیادی سہولیات کی فراہمی کے لیے تمام دستیاب وسائل بروئے کار لا رہی ہے اور اس سلسلے میں جاری ترقیاتی منصوبے نہایت اہمیت کے حامل ہیں۔

انہوں نے ہدایت کی کہ تمام متعلقہ افسران اپنی پیشہ ورانہ ذمہ داریاں احسن طریقے سے انجام دیں اور منصوبوں کی بروقت اور معیاری تکمیل کے لیے بھرپور اقدامات کریں۔ انہوں نے تاکید کی کہ ترقیاتی منصوبوں میں شفافیت، معیار اور رفتار برقرار رکھی جائے، اور کسی بھی قسم کی غفلت یا تاخیر ہرگز برداشت نہیں کی جائے گی۔

ڈپٹی کمشنر نے کہا کہ عوامی مفاد کے منصوبوں کی تکمیل سے نہ صرف علاقے کی ترقی ممکن ہوگی بلکہ حکومتی اقدامات پر عوام کا اعتماد بھی مزید مستحکم ہوگا۔

تصویر: بشکریہ ڈی جی پی آر بلوچستان