گوادر پورٹ ماسٹر پلان: ڈپٹی کمشنر نقیب اللہ کاکڑ کا گرانڈانی جنوبی کی اراضی کا دورہ، سیٹلمنٹ امور کا جائزہ

گوادر: وزیر اعلیٰ بلوچستان میر سرفراز بگٹی کے وژن کے مطابق ترقیاتی منصوبوں پر بروقت عملدرآمد اور ریونیو امور میں شفافیت یقینی بنانے کے سلسلے میں ڈپٹی کمشنر گوادر نقیب اللہ کاکڑ نے گرانڈانی جنوبی کی اراضی کا تفصیلی دورہ کیا۔

اس موقع پر ایڈیشنل ڈپٹی کمشنر (ریونیو) ظہور بلوچ، نائب تحصیلدار حاجی جاوید، قانون گو حاجی ابراہیم، پٹواری محمد یاسین بلوچ اور دیگر ریونیو افسران و عملہ بھی ان کے ہمراہ تھے۔

دورے کے دوران ڈپٹی کمشنر نے گوادر پورٹ سے متعلق انفراسٹرکچر کی ترقی، گوادر پورٹ ماسٹر پلان کے تحت مجوزہ اراضی اور اس سے متعلق سیٹلمنٹ کے مختلف ریونیو امور کا تفصیلی جائزہ لیا اور متعلقہ حکام سے پیش رفت، ریکارڈ، حدودِ اراضی اور قانونی تقاضوں کے بارے میں بریفنگ لی۔

ڈپٹی کمشنر نقیب اللہ کاکڑ نے ہدایت کی کہ تمام ریونیو امور قانون اور قواعد و ضوابط کے مطابق، مکمل شفافیت اور میرٹ کی بنیاد پر انجام دیے جائیں تاکہ گوادر پورٹ سے وابستہ ترقیاتی منصوبوں کی بروقت تکمیل میں کوئی رکاوٹ نہ آئے۔ انہوں نے زور دیا کہ سرکاری اراضی کے تحفظ، درست ریکارڈ کی تیاری اور سیٹلمنٹ کے عمل کو مؤثر اور منظم انداز میں آگے بڑھایا جائے تاکہ ضلع گوادر کی پائیدار ترقی اور عوامی مفاد کے منصوبوں کو مزید تقویت ملے۔

تصویر: بشکریہ ڈی جی پی آر بلوچستان