یوتھ لون اسکیموں میں قرض کی حد ڈھائی کروڑ روپے، کم از کم عمر 18 سال مقرر

اسلام آباد: وزیراعظم محمد شہباز شریف نے وزیراعظم یوتھ بزنس لون اسکیم اور وزیراعظم یوتھ ایگریکلچر لون اسکیم کے تحت نوجوانوں کو دیے جانے والے قرضوں کی حد 75 لاکھ روپے سے بڑھا کر ڈھائی کروڑ روپے کر دی ہے۔

نئی ہدایات

قرضوں کے حصول کے لیے کم از کم عمر کی حد 21 سال سے کم کرکے 18 سال مقرر کرنے کی ہدایت بھی کی گئی ہے۔ وزیراعظم نے اسکیم کے تحت خواتین کے لیے 30 فیصد قرضے مختص کرنے کا حکم دیا ہے۔

وزیراعظم کی زیر صدارت ہونے والے اجلاس میں نوجوانوں کو کاروبار کے مواقع فراہم کرنے، زرعی شعبے میں ان کی شمولیت بڑھانے اور مالی معاونت کا نظام مؤثر بنانے پر غور کیا گیا۔

وزیراعظم نے کہا کہ نوجوان پاکستان کا قیمتی اثاثہ ہیں۔ حکومت انہیں بااختیار بنانے اور باعزت و پیداواری روزگار کے مواقع فراہم کرنے کے لیے پرعزم ہے۔

انہوں نے ہدایت کی کہ نوجوانوں کو کاروباری اور زرعی سرگرمیوں کے لیے آسان اقساط پر ڈھائی کروڑ روپے تک قرضے فراہم کیے جائیں۔ سمال اینڈ میڈیم انٹرپرائزز ڈویلپمنٹ اتھارٹی (سمیڈا) کو کاروبار شروع کرنے سے لے کر اس کی کامیاب تکمیل تک معاونت فراہم کرنے کی ہدایت کی گئی۔

متعلقہ حکام کو ملک گیر سطح پر وسیع آگاہی مہم چلانے کی بھی ہدایت کی گئی تاکہ نوجوان ان اسکیموں، قرضوں کے طریقہ کار اور دستیاب سہولیات سے آگاہ ہو سکیں۔

اجلاس کی بریفنگ

بریفنگ میں بتایا گیا کہ جنوری 2023 سے اب تک 5 لاکھ 81 ہزار 341 نوجوانوں کو قرضے فراہم کیے جا چکے ہیں، جو گزشتہ دس برس کے مقابلے میں دس گنا زیادہ ہیں۔ اس عرصے میں مجموعی طور پر 313.9 ارب روپے کے قرضے دیے گئے۔

مالی سال 2026-27 کے دوران 2 لاکھ 66 ہزار 700 نوجوانوں کو مجموعی طور پر 292 ارب روپے کے قرضے فراہم کرنے کا تخمینہ ہے۔ وزیراعظم نے وفاقی وزیر خزانہ سینیٹر محمد اورنگزیب اور ان کی ٹیم کی کاوشوں کو سراہا۔

اجلاس میں وفاقی وزیر خزانہ سینیٹر محمد اورنگزیب، وزیراعظم کے معاون خصوصی برائے امور نوجوانان رانا مشہود احمد خان اور وزیراعظم کے معاون خصوصی برائے سیاسی امور طلحہ برکی سمیت متعلقہ حکام نے شرکت کی۔