بابر اعظم کا سری لنکا سیریز جیتنے کا عزم، سینئر اور جونیئر کے امتزاج پر زور

راولپنڈی: ٹیسٹ کپتان بابر اعظم نے کہا ہے کہ وہ سری لنکا کے خلاف ٹیسٹ سیریز جیتنے کے لیے پرامید ہیں اور ٹیسٹ میں سینئر اور جونیئر کے امتزاج کے ساتھ جائیں گے۔

اتوار کو پنڈی کرکٹ اسٹیڈیم کے میڈیا باکس میں پریس کانفرنس کرتے ہوئے انہوں نے کہا کہ سیریز میں مثبت چیزیں نظر آئیں گی۔ سکواڈ میں کافی نئے لڑکے شامل ہیں اور سب کھلاڑیوں کو اپنی نیچرل گیم کھیلنے کا کہا گیا ہے۔

نوجوان ٹیم اور کارکردگی

بابر اعظم نے کہا کہ پاکستان کی ٹیسٹ ٹیم میں 7 سے 8 کھلاڑی نوجوان ہیں اور انگلینڈ میں ہی فیصلہ کر لیا گیا تھا کہ نوجوان کھلاڑیوں کے ساتھ جایا جائے گا۔ ان کے مطابق ہمارے کھلاڑی فرسٹ کلاس کرکٹ کھیل کر آ رہے ہیں اور فارم میں ہیں۔

کارکردگی کے سوال پر انہوں نے کہا کہ ان کے اپنے کھیل میں بہتری کی گنجائش موجود ہے۔ دنیا میں سب کے ساتھ ایسا ہوتا ہے کہ کبھی آپ کارکردگی دکھاتے ہیں اور کبھی نہیں۔ ان کا مائنڈ سیٹ واضح ہے، مگر کارکردگی جیسی ہونی چاہیے نہیں ہو رہی، اس حوالے سے کوچز سے مشاورت جاری ہے۔

انہوں نے کہا کہ جو 15 کھلاڑی انہیں دیے گئے ہیں ان سے کارکردگی لینا ان کا کام ہے۔ سلیکشن کے سوال پر انہوں نے کہا کہ یہ سلیکشن بورڈ اور کمیٹی کا کام ہے۔

محمد یوسف کے بارے میں سوال پر انہوں نے کہا کہ ان کی جانب سے صرف سوشل میڈیا پر بات کی گئی، براہِ راست رابطہ نہیں ہوا۔ ان سے رابطہ ہوا تو ضرور سیکھیں گے، کیونکہ وہ لیجنڈ ہیں۔

سری لنکا کی ٹیم کے بارے میں انہوں نے کہا کہ وہ متوازن ہے، تاہم پاکستان ہوم گراؤنڈ، ہوم کنڈیشنز اور ہوم کراؤڈ کا فائدہ اٹھائے گا۔ سری لنکا ایک ماہ سے پاکستان میں کرکٹ کھیل رہا ہے اور اس کے کھلاڑی ایڈجسٹ ہو چکے ہیں۔

ایک سوال پر بابر اعظم نے مسکراتے ہوئے کہا کہ آؤٹ آؤٹ ہوتا ہے چاہے بال کیسی ہو۔ انہوں نے کہا کہ جب بھی وہ آؤٹ ہوتے ہیں اپنی غلطی کی وجہ سے آؤٹ ہوتے ہیں۔