خواجہ آصف کی نئے صوبوں کی حمایت، انتظامی بنیاد پر بارہ صوبے بنانے پر بھی اعتراض نہیں

سیالکوٹ: وزیر دفاع خواجہ آصف نے ملک میں نئے صوبے بنانے کی حمایت کرتے ہوئے کہا ہے کہ انتظامی بنیادوں پر بنائے جائیں تو ان کی تعداد بارہ بھی ہو سکتی ہے۔

اتوار کو سیالکوٹ میں جیو نیوز سے خصوصی گفتگو میں انہوں نے بتایا کہ نئے صوبوں کی تجویز پر گزشتہ دو ماہ سے بحث جاری ہے اور ملک بھر سے مختلف آرا سامنے آ رہی ہیں۔

ان کا کہنا تھا: اگر بارہ صوبوں کی تجویز ہے تو بارہ بنا دیے جائیں، مگر ان کی بنیاد زبان، نسل یا سیاسی مفادات نہیں ہونی چاہیے۔

خواجہ آصف نے چھوٹی انتظامی اکائیوں کے قیام پر زور دیتے ہوئے کہا کہ آبادی میں اضافے کے باعث عوام کو سرکاری خدمات کی فراہمی کے لیے زیادہ مؤثر نظامِ حکومت درکار ہے۔

انہوں نے کہا کہ اختیارات لاہور، کراچی، کوئٹہ اور پشاور جیسے صوبائی دارالحکومتوں میں مرتکز نہیں رہنے چاہئیں بلکہ چھوٹی اکائیوں کو منتقل کیے جانے چاہئیں۔

وزیر دفاع نے وسائل کی موجودہ تقسیم پر بھی تنقید کی۔