موسیٰ خیل: ڈپٹی کمشنر عبدالرزاق خجک کی زیرِ صدارت سیپ سسٹم میں تاریخ پیدائش کی تصحیح پر اجلاس

موسیٰ خیل: ڈپٹی کمشنر عبدالرزاق خان خجک کی زیرِ صدارت سیپ (خزانہ) سسٹم میں تاریخ پیدائش کی تصحیح کے حوالے سے ایک اہم اجلاس منعقد ہوا۔

اجلاس میں مختلف محکموں کے ملازمین کی تاریخ پیدائش میں موجود تفاوت، ڈیٹا کے اندراج میں درپیش مسائل اور سروس ریکارڈ کی آن لائن درستی کے معاملے کا تفصیلی جائزہ لیا گیا۔

ڈپٹی کمشنر کی ہدایات

ڈپٹی کمشنر عبدالرزاق خان خجک نے کہا کہ سرکاری ملازمین کے سروس ریکارڈ کی درستگی اور شفافیت حکومت کی اولین ترجیح ہے۔ سیپ (SEAP) سسٹم میں تاریخ پیدائش یا دیگر کوائف کی غلطی نہ صرف ملازمین کی ریٹائرمنٹ اور پینشن کے امور میں تاخیر کا باعث بنتی ہے بلکہ انتظامی امور میں بھی پیچیدگیاں پیدا کرتی ہے۔

انہوں نے ہدایت کی کہ تمام متعلقہ محکمے اپنے ملازمین کے سروس ریکارڈ کی تصدیق کو جلدازجلد مکمل کریں اور جن ملازمین کی تاریخ پیدائش میں تفاوت موجود ہے، اسے تمام قانونی و دفتری تقاضے پورے کرتے ہوئے مقررہ وقت کے اندر درست کروائیں۔ اس سلسلے میں کسی قسم کی غفلت یا غیر ضروری تاخیر ہرگز برداشت نہیں کی جائے گی تاکہ ملازمین کو مستقبل میں اپنے جائز حقوق کے حصول میں کسی دشواری کا سامنا نہ کرنا پڑے۔

اجلاس میں تمام متعلقہ آفیسران نے ڈپٹی کمشنر کو اپنے اپنے محکموں کی پیشرفت سے آگاہ کیا اور یقین دہانی کرائی کہ ہدایات کی روشنی میں سروس ریکارڈ کی تصحیح کے عمل کو بلا تاخیر حتمی شکل دی جائے گی۔

تصویر: بشکریہ ڈی جی پی آر بلوچستان