بلی جین کنگ کپ: ٹینس فیڈریشن اور موون پک ہوٹل میں معاہدہ، نڈال کی شرٹ نیلام ہوگی

اسلام آباد: پاکستان ٹینس فیڈریشن اور موون پک ہوٹل اسلام آباد کے درمیان پاکستان میں بلی جین کنگ کپ کے انعقاد اور کھیلوں کے فروغ کے لیے تعاون کی مفاہمتی یادداشت پر دستخط ہو گئے۔

صدر پاکستان ٹینس فیڈریشن اعصام الحق قریشی اور ہوٹل کے جنرل منیجر نکولس ورڈن نے یادداشت پر دستخط کیے۔

کینسر آگاہی کی فنڈ ریزنگ کے لیے عالمی شہرت یافتہ ٹینس اسٹار رافیل نڈال کی شرٹ اور قومی کرکٹ ٹیم کا بیٹ نیلامی کے لیے پیش کیا جائے گا۔ اس کے علاوہ اسکواش کے عظیم کھلاڑی جہانگیر خان کا ریکٹ اور ہاکی لیجنڈ شہباز سینئر کی ہاکی اسٹک بھی مہم کا حصہ ہوں گی۔ ان اقدامات کا مقصد کھیلوں کے ذریعے فلاحی سرگرمیوں کو فروغ دینا ہے۔

آٹھ ٹیمیں پاکستان آئیں گی

اعصام الحق قریشی نے کہا کہ بلی جین کنگ کپ کا انعقاد ملک کے لیے اہم موقع ہے، جس میں آٹھ ٹیمیں شرکت کے لیے پاکستان آئیں گی، جبکہ ایونٹ کے ڈراز 20 اکتوبر کو ہوں گے۔

ان کے مطابق ورلڈ ٹینس نے پاکستان پر بھرپور اعتماد کا اظہار کیا ہے، جو بین الاقوامی مقابلوں کے انعقاد کے لیے مثبت پیش رفت ہے۔ انہوں نے کہا کہ پاکستان بین الاقوامی کھیلوں کی میزبانی کے لیے موزوں ملک ہے۔

ایونٹ کے موقع پر کینسر سے آگاہی اور فنڈ ریزنگ مہم بھی چلائی جائے گی، جس کا مقصد مستحق افراد کی مدد اور عوام میں شعور اجاگر کرنا ہے۔

صدر ٹینس فیڈریشن نے مزید کہا کہ پاکستانی کھلاڑی سیف گیمز سے قبل متعدد بین الاقوامی مقابلوں میں شرکت کریں گے تاکہ انہیں اپنی صلاحیتوں کے اظہار اور تجربے میں اضافے کے مواقع مل سکیں۔

نکولس ورڈن نے پاکستان میں ٹینس کے فروغ کے لیے ہر ممکن تعاون کا عزم ظاہر کیا۔ انہوں نے کہا کہ پاکستان میں ٹینس ترقی کر رہا ہے اور مختلف ممالک کے کھلاڑیوں کی آمد خوش آئند ہے۔ انہوں نے بین الاقوامی کھلاڑیوں کو خوش آمدید کہتے ہوئے کہا کہ تعاون جاری رہے گا۔