دکی: ڈپٹی کمشنر فضل الرحمن کبدانی کا پولیو مہم کے دوسرے روز ٹیموں کا معائنہ، رہ جانے والے بچوں کو کور کرنے کی ہدایت

دکی: ڈپٹی کمشنر دکی فضل الرحمن کبدانی نے جاری انسدادِ پولیو مہم کے دوسرے روز ضلع کے مختلف علاقوں میں پولیو ٹیموں کا فیلڈ میں معائنہ کیا اور بچوں کو قطرے پلانے کے عمل، ٹیموں کی کارکردگی اور مقررہ اہداف کے حصول میں پیش رفت کا جائزہ لیا۔

انہوں نے مختلف ٹیموں سے ملاقات کرکے ان کی فیلڈ میں موجودگی، حاضری، بچوں کی کوریج اور مہم کے دوران درپیش مسائل کے بارے میں معلومات حاصل کیں اور گھر گھر جا کر قطرے پلانے کے عمل کا بھی جائزہ لیا۔

ڈپٹی کمشنر نے ہدایت کی کہ پانچ سال تک عمر کے تمام بچوں تک رسائی ہر صورت یقینی بنائی جائے اور کسی بھی وجہ سے رہ جانے والے بچوں کی فوری نشاندہی کرکے انہیں دوبارہ کور کیا جائے تاکہ مہم کے اہداف مکمل طور پر حاصل ہوں۔ انہوں نے ٹیموں کو ہدایت کی کہ کسی بھی مسئلے سے متعلقہ حکام کو فوری آگاہ کریں۔

انہوں نے والدین اور عوام سے اپیل کی کہ وہ پولیو ٹیموں سے بھرپور تعاون کریں اور اپنے پانچ سال تک کے بچوں کو قطرے ضرور پلوائیں، کیونکہ والدین کے تعاون سے ہی مہم مؤثر بنائی جا سکتی ہے۔ ڈپٹی کمشنر نے کہا کہ ضلع دکی میں مہم کی مؤثر نگرانی اور فیلڈ کوریج کے لیے مانیٹرنگ جاری رکھی جائے گی۔

تصویر: بشکریہ ڈی جی پی آر بلوچستان