کمشنر کوئٹہ ذیشان لاشاری کی زیر صدارت ڈویژن میں صحت کی سہولیات کا جائزہ، غفلت برداشت نہ کرنے کا اعلان

کوئٹہ: کمشنر کوئٹہ ڈویژن ذیشان لاشاری کی زیرِ صدارت کوئٹہ ڈویژن میں محکمہ صحت کی مجموعی صورتحال، عوام کو فراہم کردہ سہولیات اور طبی خدمات کے حوالے سے اجلاس منعقد ہوا، جس میں صحت کے شعبے کی موجودہ صورتحال، افرادی قوت، سرکاری اسپتالوں کی حالتِ زار، متعدی امراض کی روک تھام کے اقدامات اور درپیش مسائل کا تفصیلی جائزہ لیا گیا۔

اجلاس میں ڈپٹی کمشنر کوئٹہ مہراللہ بادینی، ڈپٹی کمشنر کوئٹہ ویسٹ منیر احمد درانی، ڈویژنل ڈائریکٹر ڈویلپمنٹ ظہور احمد، اسسٹنٹ کمشنر ریونیو کوئٹہ ڈویژن سید کلیم اللہ اور محکمہ صحت کے افسران شریک ہوئے، جبکہ ڈپٹی کمشنر مستونگ بہرام خان نے آن لائن شرکت کی۔

محکمہ صحت کے حکام نے سرکاری اسپتالوں اور مراکز صحت میں دستیاب طبی سہولیات، ڈاکٹرز و پیرا میڈیکل اسٹاف سمیت افرادی قوت، ادویات کی دستیابی اور اسپتالوں میں عوام کو درپیش مسائل پر بریفنگ دی، اور متعدی امراض کی روک تھام کے اقدامات سے بھی آگاہ کیا۔

کمشنر ذیشان لاشاری نے ہدایت کی کہ صحت کے شعبے میں عوام کو درپیش مسائل حل کیے جائیں اور سرکاری اسپتالوں میں خدمات کا معیار بہتر بنایا جائے۔ انہوں نے کہا کہ عوام کو صحت کی بنیادی سہولیات کی فراہمی انتظامیہ اور متعلقہ محکموں کی اہم ذمہ داری ہے اور اس سلسلے میں کسی قسم کی غفلت یا کوتاہی برداشت نہیں کی جائے گی۔

انہوں نے ہدایت کی کہ اسپتالوں اور مراکز صحت میں طبی عملے کی حاضری، ادویات کی دستیابی اور مریضوں کو دی جانے والی سہولیات کی رپورٹ آئندہ اجلاس میں پیش کی جائے، جبکہ متعدی امراض کی روک تھام کے لیے مربوط اور مؤثر اقدامات کو مزید فعال بنایا جائے۔

تصویر: بشکریہ ڈی جی پی آر بلوچستان