پولیس لائن خضدار میں یوم دفاع کی تقریب، کمشنر قادر بخش پرکانی نے یادگار شہداء پر پھول چڑھائے

خضدار: ملک بھر کی طرح ضلع خضدار میں بھی 6 ستمبر یوم دفاع پاکستان عقیدت و احترام اور قومی جذبے سے منایا گیا۔ اس سلسلے میں پولیس لائن خضدار میں پروقار تقریب منعقد ہوئی جہاں پولیس کے چاق و چوبند دستے نے سبز ہلالی پرچم کو سلامی پیش کی۔

بعد ازاں کمشنر خضدار ڈویژن قادر بخش پرکانی، کمانڈنٹ قلات اسکاؤٹس کرنل عرفان بنگش، ڈپٹی کمشنر خضدار عبدالرزاق ساسولی اور ایس ایس پی خضدار دوستین دشتی نے یادگار شہداء پر پھول چڑھائے اور شہداء کے لیے خصوصی دعا کی۔

مقررین نے 6 ستمبر 1965 کی تاریخی اہمیت پر روشنی ڈالتے ہوئے کہا کہ اس دن پاکستانی قوم اور پاک افواج نے دشمن کے ناپاک عزائم ناکام بنا کر جرات، بہادری اور قربانیوں کی تاریخ رقم کی، اور انہی قربانیوں کے باعث آج پاکستان ایک مضبوط اور محفوظ ملک ہے۔ انہوں نے کہا کہ شہداء قوم کے ہیرو ہیں اور قوم ان کی قربانیوں کو ہمیشہ یاد رکھے گی۔

تقریب کے اختتام پر ملک و قوم کی سلامتی، ترقی، استحکام اور شہداء کے درجات کی بلندی کے لیے خصوصی دعا کی گئی۔

تصویر: بشکریہ ڈی جی پی آر بلوچستان