صحبت پور: ڈپٹی کمشنر فریدہ ترین کا بازار کا دورہ، تجاوزات کے خاتمے اور خوبصورتی کی ہدایت

صحبت پور: ڈپٹی کمشنر صحبت پور فریدہ ترین نے ریونیو افسران کے ہمراہ صحبت پور بازار کا تفصیلی دورہ کیا اور صفائی ستھرائی، ٹریفک کی روانی، ناجائز تجاوزات اور عوامی آمدورفت کی صورتحال کا جائزہ لیا۔ اس موقع پر تاجر یونین کے نمائندے بھی موجود تھے۔

ڈپٹی کمشنر نے ریونیو افسران کو ہدایت کی کہ ناجائز تجاوزات کے خاتمے کے لیے قانون کے مطابق مؤثر اقدامات کیے جائیں تاکہ شہریوں کو آمدورفت میں مشکلات نہ ہوں اور بازار میں نظم و ضبط قائم ہو۔ انہوں نے بلوچستان اسپیشل ڈویلپمنٹ انیشیٹو (BSDI) کے تحت بازار کی خوبصورتی، تزئین و آرائش اور بنیادی سہولیات کی بہتری کی تجاویز کا بھی جائزہ لیا، جن میں داخلی و خارجی راستے، دکانوں کے سامنے کے حصے، صفائی اور پیدل چلنے والوں کی سہولیات شامل تھیں۔

فریدہ ترین نے کہا کہ صحبت پور بازار شہر کا اہم تجارتی مرکز ہے، اس لیے اس کی خوبصورتی اور بہتر انتظام شہریوں اور تاجروں دونوں کے لیے اہم ہے، اور ترقیاتی اقدامات میں تاجروں اور شہریوں کی تجاویز کو مدنظر رکھا جائے گا۔

ڈپٹی کمشنر نے تاجروں کے نمائندوں سے ملاقات بھی کی، جنہوں نے بازار کی بہتری کے لیے انتظامیہ سے بھرپور تعاون کی یقین دہانی کرائی۔ انہوں نے افسران کو تجاویز کو عملی شکل دینے کے لیے جامع سفارشات مرتب کرکے متعلقہ حکام کو پیش کرنے کی ہدایت کی۔

تصویر: بشکریہ ڈی جی پی آر بلوچستان