یونین کونسل سربندن میں نادرا کا ون ونڈو کاؤنٹر قائم، مولانا ہدایت الرحمن بلوچ نے افتتاح کیا

گوادر: صوبائی حکومت کی عوام دوست پالیسی کے تحت سرکاری خدمات کو عوام کی دہلیز کے قریب پہنچانے کے لیے یونین کونسل سربندن میں نادرا کا ون ونڈو کاؤنٹر قائم کر دیا گیا، جس کا افتتاح رکن صوبائی اسمبلی گوادر مولانا ہدایت الرحمن بلوچ نے کیا۔ تقریب میں نادرا کے افسران عارف بلوچ اور سعید احمد سمیت دیگر متعلقہ افراد موجود تھے۔

اس کاؤنٹر سے سربندن کے علاوہ گردونواح کے دیہی علاقوں کلاچ، نلینٹ، کپر، نوگڈو اور زیارت مچی سمیت دیگر علاقوں کے عوام بھی مستفید ہو سکیں گے، اور شہریوں کو شناختی کارڈ اور رجسٹریشن سرٹیفکیٹ کے لیے دور دراز نادرا دفاتر کا سفر نہیں کرنا پڑے گا۔

مولانا ہدایت الرحمن بلوچ نے نادرا حکام کا شکریہ ادا کرتے ہوئے کہا کہ شہریوں کو بنیادی شناختی دستاویزات کی سہولت ان کے قریبی علاقوں میں فراہم کرنا عوامی خدمت کی جانب اہم پیش رفت ہے، جس سے بالخصوص دیہی علاقوں کے عوام، خواتین اور بزرگوں کو وقت اور سفری اخراجات کی بچت ہوگی۔ انہوں نے امید ظاہر کی کہ نادرا ضلع گوادر کی دیگر یونین کونسلز میں بھی اسی نوعیت کے سہولت مراکز قائم کرے گا۔

تصویر: بشکریہ ڈی جی پی آر بلوچستان