گڈانی شپ بریکنگ ہانگ کانگ کنونشن کی جانب گامزن، کمشنر لسبیلہ سائرہ عطاء کو بی ڈی اے کی بریفنگ

گڈانی: کمشنر لسبیلہ ڈویژن سائرہ عطاء کے دورہ گڈانی کے موقع پر بلوچستان ڈویلپمنٹ اتھارٹی (بی ڈی اے) کے جی ایم شپ بریکنگ طارق بزدار اور انجینئر محبت خان بابر نے محکمانہ بریفنگ دی۔

بریفنگ میں بتایا گیا کہ حکومت پاکستان نے 1974 میں بی ڈی اے ایکٹ کی منظوری دے کر بی ڈی اے قائم کی، جبکہ 1978 میں جنرل محمد ضیاء الحق نے گڈانی کی ساحلی پٹی پر شپ ری سائیکلنگ کو باقاعدہ صنعت قرار دینے کی سمری پر دستخط کیے۔ بی ڈی اے کئی عشروں سے اس صنعت کی ریگولیٹری اتھارٹی کی حیثیت سے آپریشنل سرگرمیوں اور انتظامات کی نگرانی کر رہی ہے۔

کمشنر کو بتایا گیا کہ ہانگ کانگ کنونشن کے تحت پاکستان شپ بریکرز ایسوسی ایشن اور بیورو ویریٹاس کے درمیان مفاہمتی یادداشت (MoU) پر دستخط کیے گئے ہیں، جبکہ گڈانی کے پانچ نمایاں شپ ری سائیکلرز نے HKC کمپلائنس سرٹیفیکیشن کے لیے انفرادی معاہدے کیے ہیں۔ ہر یارڈ کے لیے شپ ری سائیکلنگ فیسلٹی پلانز (SRFPs) کی تیاری کے معاہدوں پر بھی دستخط ہوئے ہیں، اور مزدوروں کو حفاظتی تربیت کے لیے غیر ملکی ٹرینرز کی خدمات حاصل کی گئی ہیں۔

گڈانی یارڈ پاکستان کا صنعتی اثاثہ

سائرہ عطاء نے کہا کہ گڈانی شپ بریکنگ یارڈ پاکستان کا صنعتی اثاثہ ہے جو ملکی اسٹیل انڈسٹری کو خام مال فراہم کرتا ہے اور ہزاروں افراد کے روزگار کا ذریعہ ہے۔ انہوں نے کہا کہ پائیدار، محفوظ اور بین الاقوامی معیار کی شپ ری سائیکلنگ کی جانب سفر شروع ہوچکا ہے، جو حکومت پاکستان، وزارت میری ٹائم افیئرز، ریگولیٹری اداروں اور شپ بریکرز کی کوششوں کا نتیجہ ہے، اور پاکستان ہانگ کانگ کنونشن کے تحت ماحولیاتی طور پر محفوظ ری سائیکلنگ کے لیے تیار ہے۔

جی ایم شپ بریکنگ طارق بزدار نے کہا کہ یہ سب صرف کاغذی کمپلائنس کے لیے نہیں بلکہ ہانگ کانگ کنونشن کے تحت حقیقی تبدیلی لانے کے لیے کیا جا رہا ہے، اور پاکستان کی شپ ری سائیکلنگ انڈسٹری عالمی مارکیٹ میں مقابلے کے لیے تیار ہے۔

کمشنر نے بی ڈی اے، محکمہ ماحولیات اور پاکستان شپ بریکرز ایسوسی ایشن کے عزم کو سراہتے ہوئے کہا کہ وہ دن دور نہیں جب یہاں کے صنعت کار عالمی شپ بریکنگ انڈسٹری میں پاکستان کا نام روشن کریں گے۔

تصویر: بشکریہ ڈی جی پی آر بلوچستان