کوئٹہ چیمبر میں ٹی ڈیپ کا خواتین کاروباری افراد کے لیے ڈیجیٹل لٹریسی پروگرام، آن لائن کاروبار کی تربیت

کوئٹہ: ٹریڈ ڈویلپمنٹ اتھارٹی آف پاکستان (TDAP) کوئٹہ نے سرکل ویمن ایسوسی ایشن اور کوئٹہ چیمبر آف کامرس اینڈ انڈسٹری (QCCI) کے اشتراک سے کوئٹہ چیمبر میں خواتین کاروباری افراد کے لیے ڈیجیٹل لٹریسی پروگرام کا انعقاد کیا۔

پروگرام کا مقصد خواتین کاروباری افراد کو جدید ڈیجیٹل ذرائع سے روشناس کرانا، آن لائن کاروبار کو فروغ دینا اور ڈیجیٹل پلیٹ فارمز کے ذریعے نئی منڈیوں تک رسائی کے لیے عملی رہنمائی فراہم کرنا تھا۔

ابتدائی کلمات میں اسسٹنٹ ڈائریکٹر TDAP کوئٹہ آصف ابڑو نے ڈیجیٹل ٹیکنالوجی کی اہمیت اور خواتین کاروباری افراد کے لیے جدید ڈیجیٹل ذرائع سے استفادے کی ضرورت پر روشنی ڈالی۔ انہوں نے بتایا کہ TDAP پورے ملک میں کاروباری خواتین کی استعداد کار بڑھانے اور ان کے کاروبار کو برآمدات کے معیار پر لانے کے لیے کام کر رہا ہے۔

تربیتی نشست میڈم حریم نے منعقد کی، جس میں شرکاء کو موبائل فون اور دیگر ڈیجیٹل ذرائع کے مؤثر استعمال، آن لائن مارکیٹنگ، سوشل میڈیا کے ذریعے کاروباری تشہیر، مصنوعات کی ڈیجیٹل نمائش، صارفین تک رسائی اور آن لائن پلیٹ فارمز کے ذریعے کاروبار کو وسعت دینے کے طریقوں سے آگاہ کیا گیا۔ شرکاء کو عملی طور پر بتایا گیا کہ کم وسائل کے ساتھ ڈیجیٹل ذرائع بروئے کار لا کر مصنوعات اور خدمات کو وسیع تر صارفین اور ملکی و بین الاقوامی منڈیوں تک کیسے پہنچایا جا سکتا ہے۔

اختتامی کلمات کوئٹہ چیمبر آف کامرس اینڈ انڈسٹری کے صدر حاجی محمد ایوب مریانی نے پیش کیے۔ انہوں نے خواتین کاروباری افراد کی استعدادِ کار بڑھانے کے لیے ایسے تربیتی پروگراموں کی اہمیت اجاگر کی اور TDAP کے اقدام کو سراہا۔

منتظمین کے مطابق خواتین کاروباری افراد میں ڈیجیٹل مہارتوں کا فروغ انہیں اپنے کاروبار کو جدید تقاضوں سے ہم آہنگ کرنے، نئی مقامی و بین الاقوامی منڈیوں تک رسائی حاصل کرنے اور معاشی طور پر مزید بااختیار بنانے میں اہم کردار ادا کرے گا۔

تصویر: بشکریہ ڈی جی پی آر بلوچستان